Óhætt er að segja að Katrín Ísafold Guðnadóttir hafi vaknað upp við vondan draum á mánudag. Katrín er búsett við Suðurgötu í Sandgerði en þegar hún kom út á mánudagsmorgun var búið að grafa í sundur innkeyrsluna við heimili hennar.
Eins og sést á meðfylgjandi mynd varð bifreið Katrínar innlyksa og komst hún hvorki lönd né strönd.
Enginn sem lét vita
„Það var enginn sem lét okkur vita að framkvæmdir væru fyrirhugaðar,“ segir Katrín í samtali við Hringbraut. Eðli málsins samkvæmt voru Katrín og maður hennar ekki sátt við þessi vinnubrögð og segir Katrín að maðurinn hennar hafi fengið hrokafull svör þegar hann leitaði skýringa hjá verktökum á svæðinu.
„Svo fór ég út og talaði við þá og þá sögðust þeir hafa bankað og bankað en enginn komið til dyra. Það getur ekki verið því ég var heima allan daginn. Þó þeir hafi verið snemma á ferðinni og ég verið sofandi þá hefði ég vaknað,“ segir hún.
Leiðinlegt en svona er þetta
Það var svo í gær að Katrín náði sambandi við bæjarskrifstofuna en þar fengust þau svör að framkvæmdin hefði ekki getað beðið. Flætt hefði inn í hús og grípa hafi þurft strax til aðgerða. „Hann sagði að þetta væri leiðinlegt en svona væri þetta bara,“ segir hún.
Það var svo á mánudagskvöldið að verktakar á svæðinu lögðu plötur yfir skurðinn þannig að Katrín kom að minnsta kosti bílnum út. plöturnar voru svo fjarlægðar en þess í stað er búið að setja göngubrú yfir.
Erfitt að hlaða rafmagnsbílinn
Framkvæmdirnar hafa komið sér illa fyrir Katrínu og nýjan leigjandi sem var að flytja á neðri hæð hússins. „Hann þurfti að bera svefnsófa hringinn í kringum húsið og eldavél. Við erum að fara taka baðherbergið í gegn og komum ekki kerru eða neinu að til að koma með flísar,“ segir Katrín og bætir við að hún og maður hennar hafi ekki komist í apótek á mánudag til að kaupa nauðsynleg lyf. Varð það til þess að hann endaði hann á bráðamóttökunni í Fossvogi aðfaranótt þriðjudags, að sögn Katrínar..
Til að bæta gráu ofan á svart er hún á rafmagnsbíl og með hleðslustöð við húsið. Hún getur því ekki hlaðið bílinn sinn. „Mér var sagt að ég gæti hlaðið hann fyrir framan bæjarskrifstofuna. En ég geng ekki að því vísu að það sé alltaf laust þar,“ segir hún en bæjarskrifstofurnar eru auk þess nokkuð frá heimili hennar.
Katrín er allt annað en sátt og segist hafa fengið þau skilaboð að framkvæmdirnar gætu tekið einhverjar vikur, jafnvel rúman mánuð. „Mér finnst það mjög mikið. Það er til dæmis ekkert verið að vinna fyrir utan húsið núna,“ segir hún.
