Katrín spurði Ás­laugu Örnu: „Hvar er Björn Ingi?“

Nokkuð spaugi­leg upp­á­koma varð í beinni út­sendingu RÚV að loknum blaða­manna­fundi for­sætis­ráð­herra um af­léttingu ferða­tak­markanna í dag.

Katrín Jakobs­dóttir for­sætis­ráð­herra kynnti þar að­gerðir sem miðað að því að þeir sem koma til landsins, inn­lendir ferða­menn jafnt og er­lendir, geti valið um að fara í skimun fyrir CO­VID-19 við komuna til landsins í stað þess að fara í sótt­kví.

Að loknum blaða­manna­fundinum sagði Katrín að blaða­menn gætu spurt spurninga. Þegar engar spurningar höfðu verið bornar upp gekk hún að Ás­laugu Örnu Sigur­björns­dóttur dóms­mála­ráð­herra og sagði: „Engar spurningar? Hvar er Björn Ingi?“ Ó­víst er hvort Katrín hafi áttað sig á að þetta heyrðist nokkuð vel í út­sendingunni.

Björn Ingi Hrafns­son, rit­stjóri Viljans, hefur verið reglu­legur gestur á upp­lýsinga­fundum al­manna­varna­deildar ríkis­lög­reglu­stjóra í CO­VID-19 far­aldrinum. Þar hefur hann vakið at­hygli fyrir spurningar sínar og meðal annars komið fram í viku­legum þætti Gísla Marteins Baldurs­sonar.

Upp­á­komuna má sjá fljót­lega eftir að Katrín lýkur ræðu sinni.