Katrín Jakobsdóttir forsætisráðherra segir það ekki rétt að hún hafi tekið leitina að bóluefni inn á sitt borð af Svandísi Svavarsdóttur heilbrigðisráðherra.
Sjá einnig: Katrín sögð leita að bóluefni: Farið að hitna undir Svandísi?
Morgunblaðið greindi frá því á forsíðu sinni í gær að farið væri að hitna undir Svandísi vegna málsins, en misvísandi fréttir hafa borist um komu bóluefnis til landsins. Kom fram að Katrín hefði eytt drjúgum hluta mánudagsins í símtöl við hátt setta einstaklinga til að tryggja Íslendingum bóluefni.
Í frétt Morgunblaðsins í dag segist Katrín ekki hafa tekið við verkefninu. „Ég er bara að vinna vinnuna mína,“ hefur blaðið eftir henni. Hún bætir við að verkefnið hafi verið á borði ríkisstjórnarinnar lengi og heilbrigðisráðherra haft forystu um málið. „Mitt hlutverk í þessu er bara eins og allra annarra forsætisráðherra í heiminum.“
Þá hefur Morgunblaðið eftir Róberti Marshall, upplýsingafulltrúa ríkisstjórnarinnar, að koma bóluefnis til landsins sé á sömu tímaáætlun og bóluefni þeirra ríkja sem semja um það í gegnum ESB.
