„Þó að heimsfaraldurinn hafi ekki lengur áhrif á daglegt líf okkar flestra og samfélagið sé að mestu komið aftur í fyrra horf eru skýrar vísbendingar um að faraldurinn og aðgerðir vegna hans geti haft áhrif sem orðið geta langvinn verði ekki brugðist við,“ skrifar Katrín Jakobsdóttir forsætisráðherra á Facebook.
„Ríkisstjórnin ákvað af þessum sökum að setja á fót starfshóp til að vinna tillögur um aðgerðir til að draga úr neikvæðum langtímaáhrifum faraldursins á viðkvæma hópa í samfélaginu. Starfshópurinn skilaði tillögum sínum að aðgerðum í síðustu viku en þær snúa að því að auka virkni viðkvæmra hópa, koma í veg fyrir einmanaleika og félagslega einangrun eldra fólks og fatlaðra, auka þjónustu við langtímaatvinnulausa, styðja við geðheilbrigðisþjónustu og fjarheilbrigðisþjónustu og beita auknum forvörnum og þjónustu við þolendur og gerendur ofbeldis“
„Þá gerir starfshópurinn tillögur um áframhaldandi aðgerðir til að bregðast við lengri biðtíma í úrræði á vegum stjórnvalda fyrir börn m.a. hjá Ráðgjafar- og greiningarstöð og Barna- og fjölskyldustofu og aðgerðir innan framhaldsskóla í tengslum við aukið brotthvarf frá námi, sálfræðiþjónustu og náms- og starfsráðgjöf,“ heldur hún áfram.
Ákveðið hefur verið að verja einum milljarði króna á ári næstu þrjú árin til þessara verkefna sem kemur til viðbótar 750 milljónum króna sem varið er til aðgerða á þessu ári, eða samtals tæplega fjórum milljörðum króna.
„Þetta er mikilvægur liður í því að fylgja eftir þeim ágæta árangri sem við náðum í baráttunni við faraldurinn og tryggja að sú áhersla sem við lögðum á að koma í veg fyrir félagslegar og efnahagslegar afleiðingar hans skili sér til framtíðar,“ skrifar Katrín að lokum.
