Katrínu Jakobsdóttur forsætisráðherra er nú ekið um á ráðherrabíl af gerðinni Audi e-tron en ekki Mercedes Benz EQC eins og áður. Fréttablaðið greinir frá því í dag að ein af ástæðum þess að nýr bíll var fenginn hafi verið sú að farangursrými Benz-bílsins var of lítið.
Greint var frá því í nóvember í fyrra að Umbra – þjónustumiðstöð Stjórnarráðsins hefði fjárfest í nýjum rafmagnssportjeppa, Mercedes Benz, til að þjónusta Katrínu. Bíllinn kostaði 7,5 milljónir króna og fékk Umbra 25-30% afslátt af listaverði. Samhliða kaupunum var gerður samningur um kaup á þremur samskonar bifreiðum næsta árið.
Eins og Fréttablaðið greinir frá er Katrínu þó ekið um á Audi e-tron og segir Viktor Jens Vigfússon, framkvæmdastjóri Umbru, að ekki sé óvanalegt að bílar flakki á milli ráðuneyta og einstök bifreiðakaup séu ekki eyrnamerkt ákveðnu ráðuneyti. Þannig þjónustar Benz-bíllinn nú Svandísi Svavarsdóttur heilbrigðisráðherra. Audi-bifreiðin var tekin á leigu þar til útboði um þrjá rafknúna ráðherrabíla lýkur síðar í þessum mánuði.
Spurður um ástæður þess að Benz-jeppinn hafi staldrað svo stutt við og hvort það sé rétt að lítið pláss í farangursrými sé ástæðan, segir Viktor við Fréttablaðið:
„Á síðasta ári var keyptur inn einn rafmagnsbíll til reynslu. Ástæða tilfærslu var liður í prófunum á hvernig sá bíll hentar og gefa fleiri bílstjórum og ráðherrum kost á að reyna bílinn. Í útboði sem nú stendur yfir var síðan tekið mið af þeirri reynslu þegar tæknilegar kröfur voru mótaðar fyrir næstu innkaup. Þá var horft til rýmis í bílnum auk tæknilegra þátta og öryggiskrafna í samráði við Ríkislögreglustjóra. Meðal annars voru gerðar auknar kröfur um rými og veghæð.“
Frétt Fréttablaðsins.
