Katrín Jakobsdóttir, forsætisráðherra og formaður Vinstri grænna, hefur í gegnum tíðina verið sá stjórnmálaleiðtogi sem Íslendingar treysta best. Sú er ekki staðan lengur samkvæmt nýrri könnun Prósents.
Kristrún Frostadóttir, formaður Samfylkingarinnar, er samkvæmt könnuninni sá stjórnmálaleiðtogi sem Íslendingar treysta best. Fréttablaðið fjallar um þetta í dag.
Af þeim formönnum stjórnmálaflokkanna treysta 25,4 prósent Kristrúnu best af þeim sem tóku afstöðu. Að sama skapi mældist Katrín með 17,5% þegar spurt var: Hvaða formanni íslenskra stjórnmálaflokka treystir þú best? Bjarni Benediktsson, fjármálaráðherra og formaður Sjálfstæðisflokksins, er þriðji með 15,4%.
11,3 prósent landsmanna treysta Sigurði Inga Jóhannssyni, formanni Framsóknarflokksins, best. Þar á eftir kemur Þorgerður Katrín Gunnarsdóttir, formaður Viðreisnar, með 9,7 prósent, Halldóra Mogensen, þingflokksformaður Pírata, með 8,9 prósent, Inga Sæland, formaður Flokks fólksins, með 7 prósent og Sigmundur Davíð Gunnlaugsson, formaður Miðflokksins, rekur lestina með 4,6 prósent.
Fyrir utan yfirgnæfandi stuðning innan Samfylkingarinnar nýtur Kristrún töluverðs stuðnings úr öðrum flokkum. Til að mynda treysta 53 prósent kjósenda Sósíalistaflokksins henni best, 23 prósent Viðreisnarfólks, 16 prósent Pírata og 11 prósent Framsóknarmanna.
Nánar er fjallað um könnunina á vef Fréttablaðsins.
