„Ég var ekki skorinn því það var ekki skurðtækt, en ég er í góðum höndum frábærra lækna og umvafinn umhyggju og fyrirbænum. Þetta er ekki læknanlegt. Ég er svona á skilorði.“
Þetta segir Karl Sigurbjörnsson biskup í einlægu viðtali í sunnudagsblaði Morgunblaðsins. Í viðtalinu ræðir Karl meðal annars um krabbamein sem hann greindist með í blöðruhálskirtli árið 2017 og hafði dreift sér í beinin.
Karl segir að það hafi verið heilmikið áfall að greinast en hann hefur horft upp á fjóra af sex bræðrum sínum fara úr krabbameini.
Karl segir að honum líði ágætlega í dag og hann geti ekki kvartað. „Maður á að líta á hvern dag sem gjöf og þakka fyrir það. Við vitum það með lífið, það endar bara á einn veg.“
Aðspurður segir Karl að hann hræðist ekki dauðann þó dauðinn sé óvelkominn gestur.
„Nei, ég hræðist ekki dauðann […] Auðvitað vill maður ekki dauðann. Allt sem lifir er í stöðugri baráttu á móti dauðanum. Hver einasta fruma er að berjast við dauðann. Dauðinn er hið algera óþekkta og við skelfumst hið óþekkta; það er í eðli alls sem lifir. En í trúnni á ég vonina,“ segir hann meðal annars.
