Karl Garðarsson, fyrrverandi fjölmiðlamaður og fyrrverandi þingmaður Framsóknarflokksins, segir að fyrst og fremst einn maður hafi verið sigurvegari kosninganna um liðna helgi.
Það kemur kannski fáum á óvart að þingmaðurinn sem Karl nefnir sé Ásmundur Einar Daðason, félags- og barnamálaráðherra, en Framsóknarflokkurinn bætti við sig miklu fylgi.
„Það er nánast einsdæmi að sjá ráðherra í öruggu sæti í kjördæmi sínu yfirgefa það til að berjast fyrir þingsetu í kjördæmi þar sem flokkur hans hafði ekki átt þingmann í mörg ár. Það var ekki bara Ásmundur sem veðjaði á réttan hest, heldur líka Framsókn sem keyrði á honum á lokaspretti kosningabaráttunnar,“ segir Karl í færslu á Facebook-síðu sinni og bætir við að góð ástæða hafi verið fyrir því.
„Ásmundur hefur vakið verðskuldaða athygli fyrir baráttu sína fyrir velferð barna þar sem við megum vænta byltingar á komandi árum. Hann mun líka snúa sér að málefnum aldraðra á komandi kjörtímabili, kjörum þeirra og velferð. Þetta er gríðarlega mikilvægt og nauðsynlegt að hann fái að sinna ráðuneyti sínu áfram.“
