„Brynjar gerði það að hálfu ævistarfi sínu sem lögmaður að verja sakamenn. Glæpamenn. Það virðist hafa gengið svo vel að hann getur ekki hætt,“ segir Karl Th. Birgisson ritstjóri í pistli á vef Herðubreiðar.
Þar skrifar hann um Brynjar Níelsson, lögmann og þingmann Sjálfstæðisflokksins, en tilefnið er gagnrýni Brynjars á frétt RÚV fyrir helgi um málefni Samherja. Eins og Hringbraut greindi frá á föstudag var Brynjar býsna harðorður í garð RÚV vegna fréttar um að sex núverandi og fyrrverandi starfsmenn Samherja hefðu réttarstöðu sakbornings í rannsókn Héraðssaksóknara á ætluðum mútum, peningaþvætti og fleiri brotum sem tengjast Namibíustarfsemi þess.
Umræddir starfsmenn voru nafn- og myndbirtir í umfjölluninni og var það það sem fór einna helst fyrir brjóstið á Brynjari. Karl Th. Gefur lítið fyrir gagnrýni Brynjars.
„Brynjar má ekki sjá vondan málstað án þess að reyna að verja hann. Jafnvel þvert á sönnunargögn. Ekki síður eftir að hann varð alþingismaður,“ segir Karl Th. Og nefnir nokkur dæmi máli sínu til stuðnings.
„Þegar allir sáu hvernig var í pottinn búið hjá Hönnu Birnu í lekamálinu stóð Brynjar einn eftir í skotgröfinni með útúrsnúninga á lofti sem lýstu fyrst og fremst hugmyndaflugi málafærslumannsins, sem grípur hvert einasta hálmstrá. Ef ekki til þess að sýkna, þá til að milda refsinguna. Hann getur semsagt ekki hætt.“
Hann nefnir svo afstöðu Brynjars í Samherjamálinu, máli þar sem sönnunargögn benda eindregið til þess að „sitthvað meira en lítið athugavert“ hafi átt sér stað.
„Röksemd Brynjars er að nafn- og myndbirting sé svo erfið og þungbær fyrir þá sem eiga í hlut. Og fjölskyldur þeirra vitaskuld. Þetta er sígild röksemd gegn því að fréttir séu sagðar. Það sé svo erfitt fyrir þá sem fréttirnar eru um. Gudskelov að Brynjar er bara alþingismaður, en ekki ritstjóri neins staðar,“ segir Karl sem hvetur fólk til að hugsa málið betur.
„Þið getið látið hugann reika yfir helztu sakamál síðustu ára, áratuga, jafnvel alda, um hvernig fréttir af þeim hefðu verið fluttar ef ekki hefði mátt nefna nöfn eða birta myndir.“
Hann segir að sökudólginn í þessu máli sé ekki að finna hjá fjölmiðlum.
„Sökudólgurinn er alltaf gerandinn, eins og Brynjar ætti að vita eftir öll þessi ár í lögmennsku. Ekki sá sem lýsir málsatvikum eða framvindu. Í þessu tilviki er gerandinn Samherji og alveg sérstaklega Þorsteinn Már Baldvinsson, ef marka má mörg þúsund málsgögn. Ef Brynjar vill skamma þann sem veldur fjölskyldum starfsfólks hjá Samherja vanlíðan, þá er stutt að leita. Hann heitir Þorsteinn Már. Og heimatökin eru líka hæg. Ef Brynjar er ekki með símanúmerið hjá forstjóra Samherja, þá er Kristján Þór Júlíusson með það á speed-dial.“
