„Á umliðnum árum hefur orðið áberandi neikvæð umræða í samfélaginu, oft fordómafull og á köflum hatursfull um karlkynið, sem ungir drengir komast ekki hjá að verða varir við,“ sagði Karl Gauti Hjaltason, þingmaður Miðflokksins, í umræðum á Alþingi í dag.
Þar fór fram sérstök umræða um bætt uppeldi, leið til forvarna og lýðheilsu en málshefjandi var Una María Óskarsdóttir, varaþingmaður Miðflokksins.
Karl Gauti steig í pontu og beindi máli sínu að umhverfi, umönnun og uppeldi drengja sérstaklega. „Þar liggja fyrir fjölmargar rannsóknir og tölur sem endurspegla líðan þeirra og benda til að þeir eiga margir erfitt uppdráttar umfram jafnaldra sinna meðal stúlkna.“
Karl spurði hvort þetta væri ekki verðugt rannsóknarefni í baráttunni sem hér er við að eiga, til dæmis í baráttunni við eiturlyfjavandann, brottfall úr skólum og aðra þætti sem fólki er kunnugt um.
„Við erum á einu máli um árangur hvað varðar heilsu þjóðarinnar á síðustu áratugum en við leitumst við að gera betur og um það fjallar þessi umræða. Við megum ekki sofna á verðinum því ógnirnar eru margar. Hugmyndir um til dæmis auðveldara aðgengi að áfengi, aukið frjálsræði í auglýsingum um áfengi, hugmyndir um frjálsræði hvað varðar aðgengi að ýmsum fíkniefnum sem nú eru ólögleg. Allt eru þetta ógnir sem við þurfum að halda vöku okkar gagnvart.“
