Kári Stefánsson, forstjóri Íslenskrar erfðagreiningar, kveðst vona að Donald Trump Bandaríkjaforseti lifi það af að hafa fengið COVID-19. Eins og kunnugt er greindist Trump með COVID-19 í gærkvöldi eins og eiginkona hans, Melania.
Fjölmiðlar vestanhafs hafa fjallað mikið um málið og bent á að Trump sé í hæsta áhættuhópi að veikjast alvarlega. Bent er á að hann er orðinn 74 ára og þar að auki nokkuð yfir meðalþyngd. Kári segir að allar líkur séu þó að Trump nái sér fljótt og vel.
„Ég held að hann komi ekki til með að deyja. Líkurnar á því að hann komist út úr þessu eru býsna góðar,“ segir Kári í samtali við fréttavef DV. Hann nefnir að fjórðungur þeirra sem greinast og eru yfir áttrætt deyi úr sjúkdómmnum.
„Það þýðir þá að 75% líkur séu að lifa af Covid-19 sjúkdóminn. Donald Trump er töluvert yngri en það,“ segir hann og bætir við að miklar líkur séu á að hann veikist. „Allir sem sýkjast af þessu geta orðið veikir, sérstaklega offitusjúklingar,“ segir hann.
Þá segist Kári vona að Trump jafni sig. „Ég vona heitt og innilega að hann lifi svo hann geti tapað þessum kosningum,“ segir hann en óhætt er að mæla með viðtalinu.
