Kári vonar að Jón Ívar flytji heim: „Sjald­gæft að ein­stæðir feður leggi þetta mikið á sig“

„Jón Ívar, hún er vand­rötuð þrönga gatan meðal­hófsins og kannski höfum við báðir ráfað út af henni í skoðana­skiptum okkar um sótt­varnir,“ segir Kári Stefáns­son, for­stjóri Ís­lenskrar erfða­greiningar, í að­sendri grein í Morgun­blaðinu í dag.

Þar svarar hann grein Jóns Ívars Einars­sonar, prófessors við lækna­deild Harvard-há­skóla, sem birtist í Morgun­blaðinu í gær. Þar gagn­rýndi Jón Ívar meðal annars Kára og sagði að „vin­sælasti maður landsins“ hefði reist honum „níð­stöng í fjöl­miðlum“ og meðal annars minnst á fjöl­skyldu­hagi hans og börn. Jón Ívar og Kári hafa verið á önd­verðum meiði um hvaða leiðir séu bestar til að takast á við CO­VID-19.

Kári segist aldrei hafa litið svo á að Jón Ívar sé minni maður fyrir þá stað­reynd að hann hafi tjáð skoðun sína á sótt­vörnum á landa­mærum Ís­lands sem voru allt aðrar en hans.

„Eins og stendur lítur út fyrir að ég hafi haft rétt fyrir mér vegna þess að far­aldurinn hefur blossað upp í löndunum í kringum okkur og er að hjaðna hér­lendis en það skiptir bara ekki máli í þessu sam­hengi,“ segir Kári sem bætir við að það sem fór fyrir brjósti á honum var að Jón Ívar veittist að ung­lækni sem and­mælti mál­flutningi hans og kærði hann fyrir siða­nefnd Lækna­fé­lags Ís­lands.

„Það var ekki drengi­legt og hrein­lega fyrir neðan allar hellur en það gerist ýmis­legt í hita leiksins. Ef ég hefði aldrei gert neitt verra en þetta, Jón, væri slóð mín fegurri en raun ber vitni. Þegar ég benti á að þú ættir hags­muna að gæta á landa­mærunum af því þú kæmir einu sinni í mánuði til landsins til þess að sinna börnum þínum hélt ég að ég væri ein­fald­lega að benda á mann­kosti þína. Það er nefni­lega sjald­gæft að ein­stæðir feður leggi þetta mikið á sig til þess að rækta sam­band við börnin sín,“ segir Kári sem bætir við að lokum:

„Í mínum huga ertu með þessu að sanna fyrir um­heiminum, svo ekki verður um villst, að þú sért góður maður. Ég vona að við Ís­lendingar séum svo heppnir að þú á­kveðir að flytjast heim aftur og stunda hér þá læknis­fræði sem hefur komið þér til met­orða í Boston. Það er ekki vafi í mínum huga að þú sért dug­legur, flinkur og góður læknir. Slíkum manni hljótum við eyjar­skeggjar að taka opnum örmum,“ segir Kári en í grein sinni í gær sagði Jón Ívar að orðið á götunni í lækna­stéttinni væri að hann ætti erfitt með að fá vinnu ef hann kysi að flytja heim ein­hvern daginn.