Kári Stefánsson gagnrýnir forgangsröðun yfirvalda þegar kemur að dreifingu bóluefnis vegna COVID-19 hér á landi. Hann segir að fólk yfir 85 ára þurfi bólusetningu fyrst því þau séu í mesta áhættuhópnum.
Þetta kom fram í hádegisfréttum Bylgjunnar í dag. Samkvæmt reglugerð Svandísar Svavarsdóttur, heilbrigðisráðuherra, munu heilbrigðisstarfsmenn á bráðamóttöku og gjörgæsludeildum fá bóluefnið fyrstir, þar á eftir starfsmenn á COVID-19 göngudeildum. Einstaklingar 60 ára og eldri eru svo í sjötta sæti á forgangslistanum.
Kári segir þetta skjóta skökku við: „Vegna þess að þeir sem eru milli 60-70 ára er með innan við tvö prósent líkur á að deyja ef þeir sýkjast, 75 ára og eldri eru með 8,5% líkur á að deyja og 85 ára og eldri eru um 28% líkur á að deyja.“
Hann segir að notast verði við gögn þegar slíkar ákvarðanir séu teknar. Kári tekur þó fram að það sé ekki hans hlutverk að segja Svandísi fyrir verkum:
„Við erum með mjög góðan heilbrigðisráðherra og ég er alveg viss um að þegar hún fer að skoða þetta nánar þá hniki hún einhverju til, það væri mjög líkt henni.“
