„Stefán Jónsson, ég reikna með að þú sért svolítið hissa á að ég skuli skrifa þér bréf, löngu dauðum manninum.“ Svona hefst bréf Kára Stefánssonar til Stefáns Jónssonar, föður síns sem lést fyrir rúmlega þrjátíu árum. Bréfið hans birtist í Fréttablaðinu í dag.
Stefán Jónsson, útvarpsstjóri, neitaði að láta spila nýja útsetningu íslenska þjóðsöngsins, í anda þeirrar útgáfu bandaríska þjóðsöngsins sem Jimi Hendrix gerði ódauðlega á Woodstock-tónlistarhátíðinni 1969, sem síðasta lag fyrir fréttir í dag, 17. júní.
„Þegar ég fór að velta því fyrir mér hverjum meðal núverandi starfsmanna Ríkisútvarpsins ég ætti að senda þetta erindi komst ég að þeirri niðurstöðu að þótt þú hafir verið grafinn árið 1990 sé með þér töluvert meira lífsmark en með útvarpsstjóra og hans nánustu samstarfsmönnum,“ skrifar Kári.
„Ekki fór á milli mála að það var skylda mín að koma flutningi tvímenninganna á framfæri og ég hringdi í Stefán nafna þinn Eiríksson útvarpsstjóra og lagði til að hann léti spila þetta sem síðasta lag fyrir fréttir á 17. júní. Ég sendi honum upptökuna og hann sagðist ætla að skoða málið,“ skrifar Kári og segist hafa fengið skilaboð frá Stefáni fljótlega sem hljóðuðu svo:
„Stöldrum strax við 3. gr. Laga um þjóðsönginn, þar sem segir að hann skuli ekki flytja eða birta í annarri mynd en hinni upprunalegu gerð. Setur okkur augljóslega skorður. Bkv. SE.“
Kári segir þjóðina verða að hlusta á „þessa snilldarútsetningu“ á þjóðsöngnum alls staðar annars staðar en í Ríkisútvarpinu, eins og YouTube. „Ég reikna með því að þú skiljir að með því erum við ekki að halda fram hjá Ríkisútvarpinu vegna þess að maður getur ekki haldið fram hjá þeim sem vill mann ekki“ skrifar Kári.
Útgáfuna af þjóðsöngnum sem Kári vildi heyra má finna hér.
