Kári Stefánsson skorar á Willum Þór Þórsson að viðurkenna að hann hafi gert mistök þegar hann hafnaði sumum tillögum Þórólfs Guðnasonar sóttvarnalæknis og veitti undanþágur til veitingamanna og tónlistarmanna í aðdraganda jóla.
Kári ræðir stöðuna á faraldrinum við Fréttablaðið. „Ég skil ekki þann heilbrigðismálaráðherra, sem er nýbúinn að taka við störfum og ákveður sem fulltrúi ríkisstjórnarinnar í fyrsta skipti að hafna tillögum sóttvarnalæknis,“ segir Kári.
„Ég bara skil ekki hvernig manninum dettur þetta í hug. Þetta er ekki bara alvarlegt sem einstakt fyrirbrigði heldur er þetta ekki góð vísbending um það hvernig þessi heilbrigðismálaráðherra kemur til með að haga sér í embætti sínu,“ segir Kári.
„Þessar undanþágur voru alveg fáránlegar. En taktu eftir því að með þessu er hann líka að eyðileggja orðstír ríkisstjórnar, þeirrar ríkisstjórnar sem er búin að vera í gegnum allan þennan faraldur og hefur staðið sig alveg ofboðslega vel,“ segir Kári og andvarpar.
Viðtal Fréttablaðsins við Kára.
