Kári Stefánsson, forstjóri Íslenskrar erfðagreiningar, skýtur föstum skotum að Herði Ægissyni, ritstjóra Markaðarins í Fréttablaðinu,í aðsendri grein sem birtist í blaðinu í dag. Hann gefur lítið fyrir gagnrýni Harðar á það fyrirkomulag sem nú er í gildi á landamærunum.
Í leiðara sínum sem birtist í Fréttablaðinu þann 28. ágúst síðastliðinn sagði Hörður að ákvörðun ríkisstjórnarinnar, um tvöfalda skimun og fimm til sex daga sóttkví, væri efnahagslegur afleikur.
„Ákvörðun ríkisstjórnarinnar, sem lét meðal annars undan hótunum forstjóra Íslenskrar erfðagreiningar, á eftir að reynast henni meiriháttar pólitískur og efnahagslegur afleikur,“ skrifar Hörður.
Segir Hörð haga sér eins og línan sé ekki til
Í grein sinni í Fréttablaðinu í dag gefur Kári lítið fyrir gangrýnina. Hann telur af og frá að ríkisstjórnin hafi tekið umrædda ákvörðun vegna hótana sinna. En hann segist fyrirgefa Herði fyrir að vilja enda grein sína á eftirminnilegan hátt.
„Lokasetningin í greininni þinni er eitt slíkt í mjög háum tóni. Þú gefur sterklega í skyn að ríkisstjórnin hafi komið á núverandi fyrirkomulagi við landamærin af því að ég hafi hótað henni. Hverju átti ég að hóta henni? Að Íslensk erfðagreining myndi hætta að skima? Við vorum hætt að skima og ákvörðunin hafði ekkert með skimunargetu að gera heldur þá staðreynd að ein skimun nægir ekki. Eða var það kannski að ég myndi hætta að gagnrýna ríkisstjórnina og fara að styðja hana?
Það er nefnilega almannarómur að það sé ekkert til verra fyrir góðan málstað en ég fari að styðja hann. Það er öllum ljóst að í þessari staðhæfingu þinni ferðu ekki bara yfir línuna heldur hagar þér eins og línan sé ekki til.“
Segir efnahagsvandræðin rakin til veirunnar ekki landamæraaðgerða
Í grein sinni telur Kári auk þess upp sjö staðreyndir um landamæraskimunina. Hann bendir meðal annars á að töluverð reynsla hafi fengist af skimun. Í ljós hafi komið að undantekningar voru á því að það tækist að takmarka útbreiðslu veirunnra. Eðlilegt hafi verið að krefjast sóttkvíar í stað smitgátar, sem illa hafi verið skilgreind.
„Ég er sammála þér, Hörður, að við stöndum frammi fyrir mjög alvarlegri efnahagskreppu en ég er ósammála því að hún eigi rætur sínar í sóttvarnaaðgerðum á landamærum. Hún á rætur sínar í veirunni illvígu sem hefur vegið að alls konar um allan heim og meðal annars efnahagslífi,“ skrifar Kári.
Hann segist alls ekki viss um að íslenskt efnahagslíf fari verr út úr veirunni en efnahagslíf landa sem tekist hafa á við hana af meira kæruleysi en Íslendingar. Hann segir ferðaþjónustuna merkilega atvinnugrein og gjöfula en Íslendingar geti hvorki né vilji lifa af henni einni saman.
„Hörður, það er ekki skynsamlegt að gera ráð fyrir því að faraldurinn sé í mikilli rénun á sama tíma og nýjum tilfellum er að fjölga í mörgum löndum Evrópu, heildarfjöldi nýrra tilfella í heiminum sólarhringinn áður en þú birtir ritstjórnargreinina var 241 þúsund og í Bandaríkjunum einum saman 44 þúsund. Og hún heldur áfram að meiða og deyða þessi veira.“
Að síðust segir Kári að Hörður hafi ekki endað út í mýri.
„Þú endaðir ekki úti í mýri sem er sá göfugi partur af landslaginu sem verður gjarnan áfangastaður þeirra sem fara yfir línuna heldur lentirðu í ekkert-aðmarka landinu þar sem vex lítið annað en ósannindi innan um rembing og þvælu.“
