Út er komin bókin Afnám haftanna – Samningar aldarinnar? eftir Sigurð Má Jónsson, fyrrv. upplýsingafulltrúa ríkisstjórnarinnar, en Sigurður Már verður gestur Björns Jóns Bragasonar í þættinum Sögu & samfélagi á Hringbraut í kvöld kl. 21.30.
Líklega hafa Íslendingar sjaldan ef nokkurn tímann átt jafn mikið undir samningamönnum sínum og þegar samið var við kröfuhafa bankanna. Í bókinni fer Sigurður Már yfir það sem gerðist raunverulega á bak við tjöldin í aðdraganda þess að samið var við kröfuhafa. Lýst er átökum innan íslensku stjórnsýslunnar og hvers vegna leita varð út fyrir stjórnkerfið eftir aðstoð. Þá er fjallað er um hvernig sumir Íslendingar snerust á sveif með erlendum vogunarsjóðum og hve hagsmunir þeirra sem sátu í skilanefndum og slitastjórnum föllnu bankanna fóru illa saman við hagsmuni þjóðarinnar.
Við fengum leyfi útgefanda til að birta glefsu úr bókinni:
„Óhjákvæmilegt var að margir teldu sig hafa sitthvað til málanna að leggja þegar kom að slíku stórmáli sem afnámi hafta. Einn þeirra var dr. Kári Stefánsson, forstjóri Íslenskrar erfðagreiningar, en hann virðist hafa sterkar skoðanir á ýmsum málum. Síðar kom í ljós að fjárfestar í fyrirtæki Kára voru stórtækastir allra þegar kom að fjárfestingarleiðinni svokölluðu en sú leið gaf fjárfestum kost á því að koma með erlent fjármagn til Íslands og kaupa krónur á ríflegum afslætti. Kári vildi ræða milliliðalaust við forsætisráðherra um þjóðmálin og bauð honum því heim til sín að kvöldi laugardagsins 24. janúar 2015. Heimboðið var í stórglæsilegu húsi Kára við Fagraþing 5 í Kópavogi. Húsið hafði vakið athygli fyrir staðsetningu, óvenjulegan arkitektúr og stærð en þó ekki síður deilu húsráðanda um uppgjör við iðnaðarmenn sem unnu við smíði þess.
Mikið var haft við og Kári hafði ráðið bæði matsvein og þjón til að sinna gestunum svo að hann gæti notið sín í umræðunum. Auk Sigmundar Davíðs var þeim Sigurði Hannessyni og Benedikt Gíslasyni boðið. Kári vildi fjölmenni og aðrir gestir voru Agnar Helgason líffræðilegur mannfræðingur og starfsmaður hjá Kára og Ólafur Elíasson tónlistarkennari og píanóleikari. Agnar og Ólafur höfðu báðir starfað í InDefencehópnum ásamt Sigmundi Davíð og Sigurði en allir fjórir komu að stofnun hópsins. Auk þeirra var Þórir Haraldsson lögfræðingur Íslenskrar erfðagreiningar viðstaddur en hann var í eina tíð aðstoðarmaður Ingibjargar Pálmadóttur heilbrigðisráðherra og því talinn löggiltur Framsóknarmaður. Ólafur lék nokkur tónverk fyrir mat, þar á meðal byltingaretýðu Chopin og verk eftir Ravel og Bach.
Að loknum kvöldverði sýndi Kári gestum sínum húsið. Gestgjafinn sagði frá nýjum aðferðum í erfðafræði sem gengju út á að taka sýni úr ólíkum hlutum líkamans og fá þannig heildarmynd af viðkomandi einstaklingi. Sá böggull fylgdi hins vegar skammrifi að einstaklingur lifir þessa sýnatöku ekki af. Taldi Kári heppilegt að forsætisráðherra landsins yrði sá fyrsti sem þetta væri reynt á og í kjölfarið gæti hann stýrt landinu í gegnum miðil. Varð fátt um svör en viðstöddum fannst þessi tillaga vera skýr vitnisburður um óvenjulega kímnigáfu gestgjafans.“
