Kári gáttaður á þætti RÚV: „Hreint og beint skamm­ar­­legt“

Kári Jónas­son, fyrr­verandi frétta­maður og rit­stjóri, er gáttaður á þætti sem sýndur var á RÚV á þriðju­daginn í síðustu viku.

Um var að ræða fræðslu­fundinn Vel­ferð eldri borgara sem Öldrunar­ráð Ís­lands og Lands­sam­band eldri borgara stóðu fyrir.

Kári segir í pistli í Morgun­blaðinu í dag að um hafi verið að ræða „einn lengsta sjón­varps­þátt á norður­hveli jarðar“ – þátt sem stóð yfir í rúma tvo tíma og fluttar voru einar átta fram­sögu­ræður auk þess sem fundar­stjóri lagði sitt af mörkum.

„Það sem sló okk­ur sem höf­um á­huga á þess­um mála­­flokki var, að ekki einn ein­asti fram­­sögu­maður hafði það sér­­s­taka hlut­­verk að fjalla um kjara­­mál aldraða og lítið var fjallað um hús­­næðis­mál þeirra. Þetta eru þó þau bar­áttu­­mál sem hæst ber inn­an þessa ald­urs­hóps og all­ar þær regl­ur varðandi skerðing­ar­hlut­­fall, jaðar­skatta og tekju­­mörk, að ekki sé minnst á sam­­skipti eldri borg­ara við Trygg­inga­­stofn­un rík­is­ins, sem er kapí­tuli út af fyr­ir sig.“

Kári fer svo yfir það sem fjallað var um í þættinum. Þannig hafi for­sætis­ráð­herra flutt á­varp og fram­sögu­menn talað um sín sér­svið og á­huga­mál. „Lít­il­­lega var komið inn á þann frum­­skóg sem blas­ir við mörg­um þegar sækja á að­stoð og upp­­­lýs­ing­ar í hin op­in­beru kerfi, þegar eitt­hvað bját­ar á. Margs kon­ar sög­ur eru til um sam­­skipti fólks við „kerfið“,“ segir Kári í grein sinni.

Hann saknar þess að ekki var sýnt með línu­ritum á skjá­myndum hve eldri borgarar hafa dregist aftur úr hvað varðar líf­eyri frá hinu opin­bera. Þá hefði mátt minna enn og aftur á „þá hneisu“ að hækkun elli­líf­eyris var að­eins 3,6% um ára­mótin en hefði átt að vera mun hærri.

„Grái her­inn virðist hafa verið bann­orð í þess­ari löngu sjón­­varps­­send­ingu, en þessi bar­áttu­hóp­ur hef­ur vakið verð­skuldaða at­hygli á kjör­um og að­stæðum aldraðra.“

Kári segir vissu­lega gott að ræða um ein­mana­leika aldraðra, ekki síst á þessum tímum, vel­ferðar­tækni heima­þjónustu, hjúkrunar­heimili, hús­næðis­mál, hreyfingu og heilsu. „Að ekki sé minnst á rós­ótt­ar göngu­grind­ur, því það kom fram á fund­in­um að kon­ur vildu hafa þær rós­ótt­ar en ekki þess­ar svörtu venju­­legu!“

Kári endar grein sína á þessum orðum:

„Þunga­miðjan í bar­átt­unni fyr­ir hags­mun­um aldraðra hlýt­ur þó á­vallt að vera að bæta kjör þeirra, og að þeir komi að samn­inga­­borðinu þar sem fjallað er um kaup og kjör, en þurfi ekki að sætta sig við það sem þeim er skammtað úr hnefa. Það er hreint og beint skamm­ar­­legt hvernig komið er fram við þenn­an hóp á ýms­um sviðum, þótt margt hafi reynd­ar færst í rétta átt.“