Kári Stefánsson, forstjóri Íslenskrar erfðagreiningar, er engum líkur eins og margsinnis hefur sannast. Kári brá á leik í viðtali við Fréttablaðið í morgun og fór með vísu sem hann samdi á dögunum.
Kári hefur gagnrýnt yfirvöld nokkuð að undanförnu og á miðvikudag sagði hann að ríkisstjórnin væri að hrasa á lokametrunum með frumvarpi sínu um sóttvarnir á landamærunum.
„Ég gagnrýndi aðallega það að frumvarpið var sett saman þannig að það var settur lítill kassi utan um sóttvarnalækni. Mér fannst frumvarpið klaufalega sett saman en ég veit að það var sett saman af góðum vilja,“ segir Kári við vef Fréttablaðsins í morgun.
Kári segist jafnframt furða sig á því að ekki hafi enn verið samþykkt almennileg sóttvarnalög til frambúðar. Eftir fjórtán mánuði af faraldri í landinu hafi þingið ekki treyst sér til að setja lög sem myndu gilda lengur heldur en í nokkra mánuði.
„Ég veit eiginlega ekki hvað er að þessu þingi,“ segir Kári. Þegar hann var spurður hversu oft hann þyrfti að tala um þetta svo að þetta myndi gerast, svaraði Kári:
„Ég veit það ekki. Þegar ég las um það að þeir hefðu setið alveg til fimm um morguninn, linnulaust, stóðst ég ekki freistinguna og setti saman eftirfarandi vísu:
Þó þeir tali heilan helling,
heyrist sjaldan glitta í vit,
því gáfna þingsins gengisfelling,
gerir okkur flesta bit.“
Hér má lesa viðtal Fréttablaðsins við Kára í heild sinni.
