Kári Stefánsson, forstjóri Íslenskrar erfðagreiningar, segir hættulegt að nálgast kórónuveiruna sem veldur COVID-19 eins og hverja aðra veiru. Tilefni þessara orða Kára er grein sem Arnar Pálsson, erfðafræðingur og prófessor í lífupplýsingafræði, skrifaði og birti á Vísindavefnum.
Arnar var spurður að því hvort virkilega væru til hættuleg afbrigði veirunnar sem veldur COVID-19. Í svari sínu skrifaði Arnar almennt um veirur og sagði ólíklegt að stökkbreytingar í erfðamengi veirunnar valdi illvígari sjúkdómi.
Í frétt RÚV segir Kári að Arnar fari rétt með hvað veirur varðar almennt, en varðandi kórónuveiruna sem veldur COVID-19 sé varasamt að draga sömu ályktanir. Bendir hann á að í 1.400 veirum sem Íslensk erfðagreining hefur raðgreint hafi fundist 570 stökkbreytingar.
Kári segir að þegar stökkbreytingar verða hafi þær í flestum tilfellum lítil áhrif. Þessi veira sé þó þannig að sumir sem fá hana séu einkennalitlir en aðrir veikist alvarlega, og deyi jafnvel. Hann segir:
„Skepnan sem er að herja á okkur núna hefur séð við þessu með því að einkenni af henni eru það mismunandi að sumir segja að í þeim hafi sjúkdómurinn verið eins og léttvægt kvef en aðrir lenda á gjörgæsludeildum í öndunarvél. Þar af leiðandi eru þeir sem veiran fer um mjúkum höndum til staðar til þess að halda áfram að smita út um allt meðan aðrir deyja.“
Þá segir Kári að mesta hættan sé að veiran stökkbreytist þannig að hún verði árviss viðburður eins og inflúensan.
„Veiran hefur nú þegar fundist í yfir tveimur milljónum manns og þar af leiðandi er fjöldinn af þeim vinkonum orðinn óendanlegur. Þegar leitað er í því óendanlega verður hið ólíklega raunverulegur möguleiki,“ hefur RÚV eftir Kára.
