Staksteinar Morgunblaðsins í dag hafa vakið nokkra athygli enda er þar nokkuð föstum skotum skotið að Guðlaugi Þór Þórðarsyni utanríkisráðherra. Leiða má líkum að því að Davíð Oddsson, ritstjóri Morgunblaðsins, haldi þar á penna en hann var sem kunnugt er utanríkisráðherra frá 2004 til 2005.
Fullorðið fólk og barnapíur
Í Staksteinum er meðal annars fjallað um setu Íslands í mannréttindaráð Sameinuðu þjóðanna.
„Það er óburðugt að fylgjast með utanríkisráðherra úr Sjálfstæðisflokki síðustu misserin. Yfirmenn hans í ráðuneytinu dingluðu honum inn í Mannréttindaráð SÞ. Heitið er öfugmæli og ráðið verður SÞ reglubundið til minnkunar,“ segir í staksteinum.
Þá segir staksteinahöfundur að borið sé blak af Alþjóðaheilbrigðismálastofnuninni – stofnun sem sé með allt niðrum sig í alvarlegustu málum samtímans.
„Forstjórinn kemur úr Byltingarflokki Eþíópíu, og neitaði sem heilbrigðisráðherra þar að viðurkenna útbreiðslu kóleru! Og sem enn verra var; hann gerði svo mannkyninu óbætanlegt tjón með því að hann þumbaðist við til 11. mars !!! að staðfesta að kórónuveiran smitaðist á milli manna.“
Þá hafi fyrsta verk forstjóra stofnunarinnar að skipa „ömurlegustu pólitísku fígúru samtímans, Mugabe, slátrarann frá Simbabve, sem sendi „sendiherra góðviljans“ af hálfu WHO!“
Mugabe hafi þarna verið á lokametrum sem einræðisherra. Lokaorðin í staksteinum eru svona:
„Á sama tíma og yfirmenn ESB eru staðnir að því að láta Kína ritskoða yfirlýsingar sínar um kórónuveiruna ákváðu þeir, til að dreifa athyglinni, með skætingi í garð Ungverjalands eins og reglulega gegn Póllandi, sem þeir minna á að sé ekki lengur fullvalda ríki vegna aðildar sinnar að ESB. Fyrstu þjóðirnar sem hlaupa til með umvöndunarprikið þegar ESB ýtir á takka eru skandinavísku barnapíurnar. Á meðan fullorðið fólk stjórnaði íslenska utanríkisráðuneytinu var þess vandlega gætt að Ísland væri ekki ein af barnapíunum.“
Aðstoðarmaður Guðlaugs svarar
Viljinn greindi frá því í dag að Diljá Mist Einarsdóttir, aðstoðarmaður Guðlaugs Þórs, hafi svarað skrifunum í Morgunblaðinu í dag. Við sama tilefni velti Björn Ingi Hrafnsson, ritstjóri Viljans, því fyrir sér á Facebook hvers vegna kalt stríð væri skollið á milli Morgunblaðsins og Guðlaugs Þórs. „En það er engu að síður staðreynd. Og stóru orðin síst spöruð,“ sagði hann.
Í færslu Diljár, sem Viljinn vitnaði til, kom hún Guðlaugi til varnar og sagði hann ekki hafa skorast undan þegar leitað var til Íslands um setu í mannréttindaráði Sameinuðu þjóðanna. Varðandi forstjóra WHO og embættisfærslur hans sagði Diljá vandséð hvernig utanríkisráðherra gæti borið ábyrgð á þeim. Varðandi stöðuna í Ungverjalandi hafi Guðlaugur Þór verið í liði með norrænum kollegum sínum, alþjóðlegum samtökum og mannréttindafélögum.
„Allt mjög fullorðins, ef þú spyrð mig. En ég er auðvitað ung og aðhyllist sömu gildi. Og það eru forréttindi að framfylgja slíkri stefnu. Ég hitti fjölbreyttan hóp fólks frá degi til dags og heyri í enn fleirum. Ef til vill horfðu hlutirnir öðruvísi við mér ef ég hefði einangrað mig uppi á hæð í Árbænum,“ segir hún.
