„Þetta á að kenna okkur eitt. Við eigum ekki að vinna meira en svona sex tíma á dag. Það er bara nóg,“ segir Jónína Benediktsdóttir, íþróttafræðingur og athafnakona.
Jónína var gestur Sigurlaugar M. Jónasdóttur í þættinum Segðu mér á Rás 1 í síðustu viku. Í viðtalinu fóru þær Jónína og Sigurlaug um víðan völl og ræddi Jónína meðal annars um áfengisneyslu sína á sínum tíma.
Eftir að hafa dvalið lengi í Póllandi með heilsuhótel sitt er Jónína komin til Íslands þar sem hún býður upp á heilsumeðferðir á Hótel Örk í Hveragerði. Jónína segist hafa meira að gefa núna en áður.
„Ég gef öðruvísi, ég hlusta mikið, mikið betur og get tengt. Hjá mér núna eru margir hjúkrunarfræðingar í detox-meðferð, örmagna, búnir að ganga upp að öxlum fyrir okkar þjóð eftir COVID,“ sagði Jónína í viðtalinu og bætti við:
„Að hlusta á þær, ég fæ bara tár í augun. Þeim líður nákvæmlega eins og mér leið þegar ég fór í mitt „burnout“. Þetta er alvarlegur sjúkdómur,“ sagði Jónína í viðtalinu en hún lenti í kulnun á síðasta ári. „Ég var úti í Póllandi og man bara ekkert. Systir mín bjargaði mér, ég rétt komst heim. Þetta tengist bara ofálagi og langvarandi streitu og kvíða,“ sagði hún.
Jónína sagði að hennar reynsla hefði kennt henni að vinnudagurinn eigi ekki að vera meira en sex tímar á dag. „Það er bara nóg. Við eigum ekki að taka ábyrgð á öllu í kringum okkur.“
Hér er hægt að hlusta á viðtalið við Jónínu.
