„Draumur minn er að flestum líði sem best. Sennilega er ég barnaleg,“ segir Jónína Benediktsdóttir, íþróttafræðingur og athafnakona.
Jónína Ben segir frá því á Facebook-síðu sinni að hún hafi skotist út í bakarí í morgun til að ná sér í súrdeigsbrauð. Jónína hefur góða reynslu af umræddu bakaríi og segir að þar vinni úrvalsstarfsfólk, allt gangi eins og vel smurð vél og ekkert sem klikkar.
Það var þó eitt sem vakti athygli Jónínu þegar ung afgreiðslukona afgreiddi hana.
„Stúlkan var með hreim og eins og alltaf spurði ég: Ertu pólsk? Sorglegt, en ég fann að hún fór í vörn líkt og það væri skömm að vera af erlendu bergi brotin en vinna hér,“ segir Jónína sem bætir við að hún finni það iðulega að fólk skammist sín fyrir að kunna ekki íslensku og haldi raunverulega að það sé einhver skömm.
„Ég eignaðist nýja vinkonu í morgun og með bros sögðum við hvor við aðra: „Have a Nice Weekend.“
Eins og flestir vita þá hefur Jónína dvalið langdvölum í Póllandi og hún þekkir það því vel að fara af erlendu bergi brotin í öðru landi. „Ekki get ég lært pólskuna almennilega og hef unnið þar í 18 ár.“
Jónína sendir mikilvæg skilaboð til Íslendinga og hvetur þá til að koma vel fram við útlendinga sem starfa á Íslandi.
„Verum góð við það fólk sem hér heldur uppi hagvextinum og hvað með það þótt það læri ekki íslensku? Við bjóðum ekki fólki hingað og erum með útlendingafordóma, er það? Hvað þá að nota fólk í að vinna á ólöglegum launum ? Flókið hagkerfi heimsins kemur okkur úr jafnvægi, því miður, en það má elska allt fólk sama hvaðan það kemur.“
