Jónína Benediktsdóttir, íþróttafræðingur og athafnakona, á það til að vera sprenghlægileg og í færslu á Facebook-síðu sinni segir hún á býsna skemmtilegan hátt frá ógöngum sem hún lenti í í nótt.
„Sáuð þið handleggsbrotna konu að eltast við trampólín í nótt klukkan þrjú. Konan var í hvítum nærbuxum frá Victoria Secret og náttskyrtu frá Boss,“ segir Jónína í færslunni.
Jónína segir að hún hafi barist við trampólínið, náð því inn í skot og skriðið svo eftir grasinu. Ekki vildi betur til en svo að dyrnar höfðu lokast og komst hún ekki inn í húsið fyrr en hún lagðist á magann og óbrotna höndin náði tökum á kanti sem hjálpaði við að opna dyrnar.
„Konan var símalaus. Brotna hendin er enn á handleggnum, nærbuxurnar komnar í þvott en náttskyrtan rifin. Nei, bara ef að þið hafið ekki séð þessi tilþrif þá bíðið eftir næsta roki, þá gæti sagan endurtekið sig,“ segir Jónína sem hefur fengið þó nokkur viðbrögð við færslunni.
„Konan leitar að duglegum karlmann sem kann að flokka rusl og taka trampólín í sundur. Betra er ef hann er ekki handleggsbrotinn. Sem betur fer var hálkan farin því hefði rokið komið í fyrrinótt væri þessi kona á brókinni fljótandi á trampólíni í sundlauginni á Hótel Örk. Já næturnar eru oft skrautlegar í Hveragerði,“ sagði Jónína sem endaði færsluna á þessum orðum:
„Ef þetta hefði verið draumur þá merkti hann bara gott, en þar sem þetta var ekki draumur merkir sagan að maður er ekki af baki dottinn.“
