Jónína Benediktsdóttir, íþróttafræðingur og athafnakona, hefur fulla samúð með starfsmönnum verslana þessa dagana. Jónína er búsett í Hveragerði eins og kunnugt er og leggur hún leið sína reglulega í verslun Bónus í bænum.
Jónína deildi ákalli Ragnars Þórs Ingólfssonar, formanns VR, á Facebook-síðu sinni í vikunni, en í ákallinu biðlaði Ragnar Þór til almennings um að sýna starfsfólki verslana kurteisi og virðingu.
„Það kostar ekkert að segja takk fyrir að standa vaktina eða þið standið ykkur eins og hetjur. Verum óspar á hrós til þeirra sem standa vaktina og sýnum hvort öðru tillitssemi,“ sagði Ragnar.
Jónína segir að þeir séu tveir starfsmennirnir í Bónus sem hafa þjónað henni dyggilega síðan hún flutti. „Alltaf spjöllum við, ég spyr út í áhugamálin, hvort þeir séu þreyttir með grímuna, hvort einn poki dugi, hvort þeir fari ekki út undir bert loft af og til og andi, hvort sé búið að vera mikið af fýluprumpukerlingum að pirra,“ segir Jónína sem nefnir í framhjáhlaupi að hún hafi eitt sinn spurt þá hvað maðurinn hét sem stofnaði Bónus.
„Nei þeir þekktu ekki Jóhannes, svona er þetta maður gleymist fljótt ef enginn segir söguna,“ segir hún. Jónína endar færslu sína á skilaboðum til þeirra sem líta á starfsfólk verslana sem sjálfsagðan hlut´og þeirra sem þurfa, einhverra hluta vegna, að sýna þessu mikilvæga fólki dónaskap.
„Í Guðanna bænum takið hausinn á ykkur út úr eigin rassi, frekjuhundar. Prófið kannski að vinna í Bónus allan daginn með grímu. Vá, hvað ég verð ógeðslega reið þegar heimskt fólk frekjast og hefur ekki efni á neinu sjálft, leggur ekkert af mörkum sjálft. Þannig fólk er það sem glymur hæst í, þeim sem eru að kafna úr minnimáttarkennd, jafnvel út í kassafólkið í matvöruverslunum.“
