Jón Viðar Jónsson, einn fremsti leikhúsgagnrýnandi þjóðarinnar og samfélagsrýnir, hefur fengið nóg af umræðunni um grímuskyldu. Á sama tíma og nánast engin COVID-19 smit greinast hér á landi dag eftir dag hafa sífellt fleiri kallað eftir því að grímuskylda verði afnumin.
Jón Viðar skrifaði kraftmikla færslu á Facebook-síðu sína í gær þar sem hann gagnrýndi þessa orðræðu.
„Þetta er nú meiri barlómurinn sem gellur við hér á FB um grímuskylduna. Það var kannski ekki heppilegt af Þórólfi sóttvarnalækni að missa það út úr sér að við kynnum beinlínis orðið vel við grímurnar, en fyrr má nú vera; maðurinn hefur staðið í víglínunni í ár, staðið sig á heildina litið frábærlega vel svo við megum öll vera þakklát fyrir. Þó honum verði einu sinni smá fótaskortur á tungunni!“
Jón Viðar segir að grímurnar fari vafalítið misvel í menn og til dæmis þeir sem ganga með gleraugu, hann sjálfur þar með talinn, geti fundið fyrir óþægilegri móðumyndun.
„Það drepur varla nokkurn mann nema maður sé alveg upp í öðrum sem gerist nú orðið æ sjaldnar!! Reynum að skilja það að þetta fyrirkomulag er (ef einhver skyldi ekki vera búinn að fatta það) til að vernda okkur sem heild, ekki síst þá sem mega við litlu; að tala um þetta sem "frelsisskerðingu" er út í bláinn og lyktar ekki af öðru en pólitískum öfgum,“ segir Jón Viðar sem endar færsluna sína á þessum orðum:
„Ekki vildum við horfa upp á Landsspítalann og aðrar heilbrigðisstofnanir springa undan álagi, eins og víða hefur gerst, eða fjöldagrafir teknar uppi í Gufunesi!! Nei, nú er að sanna að við séum "Sannir Íslendingar" sem kunnum að þreyja þorann og góuna og bíða þess að aftur birti á ný - eins og þar stendur!“
