„Skammarlegt hjá samgönguráðherra. Ef hann reynir að koma vegagjöldum á vegna áhrifa kórónaveirunnar þá er mér að mæta,“ segir Jón Þór Ólafsson, þingmaður Pírata.
Jón Þór vandar Sigurði Inga Jóhannssyni, samgöngu- og sveitarstjórnarráðherra, ekki kveðjurnar í færslu á Facebook. Tilefnið er frumvarp um samvinnuverkefni sem Sigurður Ingi hefur lagt fram, en það myndi heimila Vegagerðinni að eiga samvinnu við einkaaðila um fjármögnun, hönnun, undirbúning og framkvæmdir við sex ákveðin verkefni.
„Þá verður heimilt að fjármagna samvinnuverkefni að hluta eða öllu leyti með gjaldtöku af umferð,“ segir á vef stjórnarráðsins þar sem fjallað er um frumvarpið.
Verkefnin sem lagt er til að unnin verði sem samvinnuverkefni eru hringvegur norðaustan Selfoss og brú á Ölfusá, hringvegur um Hornafjarðarfljót, Axarvegur, tvöföldun Hvalfjarðarganga, hringvegur um Mýrdal og jarðgöng í Reynisfjalli og Sundabraut.
Jón Þór telur að Sigurður Ingi sé að reyna að koma á veggjöldum í skugga kórónuveirunnar, en Björn Leví Gunnarsson, þingmaður Pírata og samflokksmaður Jóns Þórs, telur ósennilegt að kórónuveiran hafi nokkuð með frumvarpið að gera.
„Þetta er búið að vera planað lengur en það ... þannig að þetta er ekki vegna kórónaveirunnar sem þetta frumvarp er að koma,“ segir Björn.
Jón Þór segir í athugasemd í þræðinum að Sigurður Ingi ætti að draga frumvarpið til baka. „En hann er samt að leggja þetta fram þegar það er hættuástand, og hvað, vill hann bara leggja það fram en ekki að unnið sé að því? Þvílíkur auli […] Hann ætti að sjá sóma sinn í því að draga frumvarpið til baka í stað þess að freista þess að fá þetta á dagskrá á þessu þingi.“
Líneik Anna Sævarsdóttir, þingkona Framsóknarflokksins, skiptist svo á nokkrum orðum við Jón Þór. Hún tekur undir með Birni Leví og segir að málið hafi legið fyrir Alþingi í samgönguáætlun frá því í nóvember. Jón Þór spyr á móti hvort eigi að réttlæta vegatolla vegna áhrifa kórónuveirunnar. Því svarar hún að bragði: „Þetta er annað mál en vegatollar.“
