„Ég myndi bara hvetja þá sem hafa áhuga til að skoða þetta, skoða hvaða vörur samkeppnisaðili Örnu hefur komið með á markaðinn undanfarna mánuði og ár,“ segir Jón Páll Hreinsson, bæjarstjóri í Bolungarvík og stjórnarmaður hjá mjólkurvinnslunni Örnu ehf., í samtali við Hringbraut.
Jón Páll skrifaði grein sem birtist á vef Vísis í gær en umrædd grein bar yfirskriftina Hvernig losar þú þig við samkeppnisaðila – nokkur góð ráð handa einokunarfyrirtæki.
Þó Jón Páll nefni aldrei Mjólkursamsöluna á nafn í pistli sínum er augljóst til hvaða fyrirtækis hann er að vísa. Eins og nafn pistilsins gefur til kynna skrifar hann um þær leiðir sem einokunarfyrirtæki geta farið til að losa sig við samkeppnisaðila. Í fyrsta lagi nefnir Jón að einokunarfyrirtæki geti framleitt eins vörur og samkeppnisaðilinn.
„Nýir aðilar á markaði koma gjarnan inn með nýjar áherslur í vöruframboði. Þeir þróa vörur sem neytendum finnst vera spennandi og eru tilbúnir að færa sig frá einokunarfyrirtækinu sem ekki hefur sinnt því sem skyldi. Með því að kópera nýsköpun hins nýja samkeppnisaðila og þróa eins vörur (þótt þær heiti öðru nafni) minnkar þú sérstöðu hans,“ segir hann í grein sinni.
Þá nefnir Jón Páll í pistli sínum að einokunarfyrirtæki geti ráðist beint á sérstöðu litla samkeppnisaðilans. „Ef samkeppnisaðilinn hefur náð að skapa sér sérstöðu, t.d. með því að bjóða uppá umhverfisvænar umbúðir, þá má alls ekki leyfa honum að komast upp með slíkt og bjóða umsvifalaust upp á eins pakkningar. Ef þú getur ekki boðið uppá eins pakkningar, þá má breyta pakkningum og merkja þær umhverfisvænar.“
Jón Páll tekur það fram að hann sé ekki að saka Mjólkursamsöluna um lögbrot en í pistli sínum segir hann að þau fjögur ráð sem hann telur upp séu öll siðlaus. Þá tekur hann fram að hann sé á engan hátt hlutlaus aðili enda bæjarstjóri Bolungarvíkur og stjórnarmaður í Örnu.
„Á engan hátt ætla ég að segja að MS hafi gerst brotlegir við lög, ég hef ekki hugmynd um það. Hins vegar er ég bara að setja þetta fram svo fólk viti af þeim leiðum sem markaðsráðandi fyrirtæki beita gjarnan á þessi minni fyrirtæki,“ segir Jón Páll og bætir við að MS hafi rúmlega 90 prósenta markaðshlutdeild.
Jón Páll bendir á að starfsemi Örnu sé gríðarlega mikilvæg fyrir Bolungarvík og honum sé mjög annt um velferð fyrirtækisins.
„30-40 starfsmenn hljómar kannski ekki mikið en skiptir svakalega miklu máli fyrir þúsund manna samfélag,“ segir hann og bætir við að Bolungarvík væri ekki á þeim stað sem það er á í dag ef fyrirtækið hefði ekki hafið starfsemi á staðnum.
„Það er ekki um auðugan garð að gresja á landsbyggðinni þegar kemur að sprotafyrirtækjum sem eru að skapa ný tækifæri. Þess vegna er mér mjög annt um velferð þessa fyrirtækis og ég mun berjast með kjafti og klóm fyrir tilverurétti þess.“
