Jón Páll Sigmarsson, einhver þekktasti íþróttamaður í sögu íslensku þjóðarinnar, hefði orðið sextugur í dag, 28. apríl. Jón Páll lést þann 16. janúar 1993, 32 ára að aldri.
Sigmar Freyr Jónsson, sonur Jóns Páls, minnist föður síns með fallegum orðum á Facebook-síðu sinni. Hann veitti Hringbraut góðfúslegt leyfi til að birta færsluna.
„Mikið hefði það verið gott og gaman að hafa þig aðeins lengur hérna hjá okkur,“ segir Sigmar í færslunni og bætir við að sem barn hafi verið magnað að eiga Jón Pál sem pabba.
„Ég man eftir að horfa á He-Man heima hjá þér á Framnesveginum og líta svo á þig og sjá að þið voruð bara alveg eins. Ofurhetjur voru teiknaðar eins og þú varst í alvörunni.“
Hann segir að eins gaman og það hafi verið að eiga pabba sem var ofurhetja hafi stundirnar sem þeir feðgar áttu saman verið ógleymanlegar. „Þú varst yndislegur pabbi, kærleiksríkur, kíminn og stríðinn. Ég á ekkert nema góðar minningar af þér elsku pabbi minn og megi minning þín lifa um ókomin ár.“
Jón Páll er af mörgum talinn einn sterkasti maður sögunnar. Hann var fyrsti maðurinn til að hljóta titilinn Sterkasti maður heims í fjórgang. Keppnirnar vann hann árin 1984, 1986, 1988 og 1990. Þess á milli var hann ávallt í einu af efstu sætunum.
Jón Páll fæddist í Hafnarfirði þann 28. apríl árið 1960 og æfði hann meðal annars knattspyrnu, handbolta og hlaup sem barn. Hann hóf keppnisferil sinn í aflraunum árið 1979 og vann hann til ófárra verðlauna á ferli sínum, bæði hér heima og erlendis. Jón Páll var valinn íþróttamaður ársins árið 1981.
