Jón Baldursson, tvöfaldur heimsmeistari, tekur í dag við landsliðinu í opnum flokki í bridds. Óhætt er að segja að Jón njóti virðingar í briddsheiminum enda var hann í hópi Íslands sem varð heimsmeistari árið 1991. Árangurinn að undanförnu hefur þó ekki verið góður og því ætlar hann að breyta.
Fréttablaðið fjallar um þetta í dag og segir frá því að Jón taki sjálfur sæti í landsliðinu. Sigurbjörn Haraldsson verður makker og fjórir aðrir spilarar verða svo í liðinu.
„Ég hef verið mikill áhugamaður um framgang briddsins hér á landi,“ segir Jón við Fréttablaðið og bætir við: „Okkur gekk mjög illa á síðasta Evrópumóti. Nú er ég hættur að vinna og hef tíma, við hjónin verðum vonandi eitthvað saman í þessu verkefni.“
Jón segir við Fréttablaðið að markmiðið sé skýrt, koma Íslandi á HM með því að ná góðum árangri á Evrópumótum 2024 og 2026 auk þess að ná sigri á Norðurlandamótum.
„Við höfum alveg mannskap í þetta. Við erum að glíma við atvinnumenn í hinum liðunum en við ætlum að vaða í þá,“ segir hann og bætir við að hugarfar og góður agi sé mikilvægur.
„Ég reikna með að flestir þeirra sem ég muni velja í liðið búi yfir góðum aga. Bakkus verður bannaður og menn þurfa að sofa á nóttunni og hvíla sig,“ segir hann og bætir við að árangur sé eitt af því sem laðar að nýtt ungt fólk.
