Grínistinn og rithöfundurinn Jón Gnarr fer ófögrum orðum um sjávarútveigsfyrirtækið Samherja í færslu sem birtist á Twitter í dag.
Þar vísar hann til máls sem er nýkomið upp, og varðar það að Samherji hafi reynt að stöðva útgáfu bókar um fyrirtækið.
Stundin fjallar um málið í dag, en þar segir að Egill Örn Jóhannsson, framkvæmdastjóri Forlagsins, hafi fengið tölvupóst um að innkalla bókina til að spara sér mikinn málskostnað. Sérstaklega var tekið fram að málið yrði höfðað í Englandi, líklega vegna þess að það kosti meira.
„Googlaðu bara English defamation law og hvað málflutningsmaður QC kostar á klukkutímann. Þetta er ekki hótun ... bara að aðstoða þig að taka upplýsta ákvörðun.“ segir í tölvupóstinum.
Þetta virðist hafa farið fyrir brjóstið á Jóni: „Alls engin hótun, sko, bara vinsamleg ábending um hvað við erum ósvífnir og siðlausir drullusokkar.“ skrifar Jón, sem endurtekur síðan innihald tölvupóstsins.
