Jón Gnarr kemur lög­reglunni til varnar: „Hatrið gegn löggunni er svo mikið“

Jón Gnarr, grín­isti og fyrrum borgar­stjóri, kemur lög­reglunni til varnar í röð tísta sem hann birti í dag. Lög­reglan hefur verið gagn­rýnd undan­farna viku vegna hlut­verki hennar í brott­vísun flótta­manna í síðustu viku.

„Að vera lögga er erfiðasta starf á Ís­landi. Hver vakt er ó­vissu­ferð og þú þarft að ganga inn í að­stæður og sjá hluti sem engin manneskja ætti að þurfa að sjá. Þung­lyndi og kvíði er hluti af starfinu, sjálfs­vígs­tíðni er ein hæsta meðal starfs­stétta og úr­ræðin eru tak­mörkuð,“ sagði hann á Twitter.

Jón varð fyrir mikilli gagn­rýni fyrir að verja lög­regluna eins og hann gerði. „Hatrið gegn löggunni er svo mikið að ef ein­hver reynir að taka upp hanskann fyrir al­mennum löggum og benda á að þetta er bara fólk sem er að vinan hræði­lega erfitt starf verður við­komandi tekinn niður með öllum ráðum því heiftin skal ráða för,“ sagði Jón í svari við gagn­rýninni.

Jón virðist hafa fengið nóg af lög­reglu­málinu og sagðist ekki nenna að ræða það frekar. „Ömur­legt hvernig að þessu var staðið. Sam­mála því. Harma það. En mér finnst út­lendinga­and­úð Ís­lendinga ó­skiljan­leg og lögin ó­manneskju­leg og ekki við lögguna að sakast heldur kerfið. Auð­vitað má skamma löggur sem ganga of langt,“ sagði Jón.