„Við hjónin höfum ferðast töluvert innanlands í sumar og notið þjónustu eins og hún gerist best í heiminum,“ segir Jón Magnússon, hæstaréttarlögmaður og fyrrverandi þingmaður.
Jón skrifar pistil á Facebook-síðu sína þar sem hann gagnrýnir þá ákvörðun yfirvalda að setja strangari skorður á komur ferðamanna til landsins. Eins og kunnugt er þurfa ferðamenn nú að fara í tvær sýnatökur, þá seinni eftir að hafa verið í sóttkví í 5 daga.
Jón segir að það sé í raun sorglegt að ríkisstjórnin hafi ákveðið að stefna fyrirtækjum í ferðaiðnaði í fjöldagjaldþrot að ástæðulausu. Um reynslu sína af ferðalagi um Ísland í sumar, segir hann:
„Það er ekki annað hægt en að dást að framförunum og fagmannlegum vinnubrögðum og viðgjörningi. Þetta hefur verið stórt stökk framávið á stuttum tíma og ástæða til að hrósa þeim sem að þessu hafa komið og vera stolt yfir því að við skulum hafa byggt upp þjónustu sem stendur hvað fremst í veröldinni.“
Jón vindur sér svo að stjórnvöldum og ákvörðun þeirra um tvöfalda sýnatöku og sóttkví.
„Það er því með öllu óskiljanlegt og ófyrirgefanlegt, að ríkisstjórnin skuli hafa ákveðið að stefna fyrirtækjum í ferðaiðnaði í fjöldagjaldþrot gjörsamlega af ástæðulausu og gera með því sitt til að eyðileggja þennan vaxtarsprota velmegunar í landinu.“
Ekki eru allir sammála Jóni og hafa fjölmargar athugasemdir verið skrifaðar við færslu hans. Snúast þær margar um að heilsa fólks verði að vera í fyrsta sæti.
Einn bendir á að ríkisstjórnin hafi ekki ákveðið fjöldagjaldþrot enda stjórni hún ekki gangi COVID-19. „Ferðaþjónustan verður bara að taka niðursveiflunni alveg eins og hún græddi á uppsveiflunni. Þannig virkar alvöru kapítalismi.“
Jón svarar því til að ráðstjórnin hafi þarna tekið fram fyrir hendurnar á kapítalismanum og eyðilagt starfsemi hans að ástæðulausu. „Það er það sem skiptir máli og fyrirtæki í samkeppnisrekstri standast aldrei algjöra hryðjuverkaárás ríkisvaldsins eins og nú er um að ræða.“
