„Góðan daginn sagði ég við afgreiðslumanninn. Sá tók ekki undir kveðjuna og þegar ég falaði ákveðinn hlut til kaups, sagðist hann ekki tala íslensku, þannig að ég varð að endurtaka kauptilboðið á ensku.“
Þetta segir Jón Magnússon, hæstaréttarlögmaður og fyrrverandi þingmaður á bloggsíðu sinni. Þar gagnrýnir hann það sem hann kallar metnaðarleysi þegar kemur að því að vernda íslenska tungu. Hann bætir við að enginn kippi sér upp við það lengur þó fólk í þjónustustörfum á Íslandi tali ekki íslensku.
„Viðskiptamálið enskan er óðum að taka yfir í samskiptum fólks. Þeir sem ekki kunna góð skil á enskri tungu lenda iðulega í vandræðum,“ segir hann.
Hann segir að íslenskan lifi enn góðu lífi meðal þjóðarinnar vegna þess sem vel var gert á árum áður. Nú sé farið að halla verulega undan fæti.
„Við höfum því miður ekki sýnt þann þjóðlega metnað að gera kröfu til þess, að þeir sem sinna þjónustustarfsemi á Íslandi fyrir Íslendinga tali íslensku. Af hverju ekki? Er okkur ekki annt um að íslenskan fái að dafna og vera áfram lifandi mál á Íslandi?“
Jón hefur áhyggjur af því að án tungumálsins fjari undan íslenskri menningu og íslenskri þjóðarvitund.
„Það skiptir því máli, að við gerum sjálfsagðar kröfur til þess að neytendur eigi undantekningarlítið rétt á því að þjónustuaðilar tali íslensku. Löggjafinn getur gert ráðstafanir í þessu sambandi og ætti að hafa þjóðlegan metnað til að gera það,“ segir hann.
