Jón Baldvin Hannibalsson, fyrrverandi ráðherra og sendiherra, segir að honum hafi borist ákæra frá saksóknara vegna meints kynferðisbrots. Jón Baldvin upplýsir þetta í aðsendri grein í Morgunblaðinu í dag.
„Sakarefni er meint kynferðisbrot á mínu eigin heimili gagnvart gestkomandi konu. Nánar tiltekið á sakarefnið að vera að hafa „strokið utan klæða upp og niður eftir rassi“ viðkomandi. Þetta á að hafa gerst í augsýn gestgjafans, konu minnar, og annarra gesta. Trúlegt, eða hitt þó heldur! Þetta sætir óneitanlega furðu af þeirri einföldu ástæðu, að þetta er með öllu tilhæfulaust. Hreinn uppspuni. Þetta hafa trúverðug vitni vottað við rannsókn málsins, sem hefur tekið lögreglustjóraembættið bráðum tvö ár að rannsaka. Það er von að spurt sé: Á hvaða leið er ákæruvaldið?,“ segir Jón Baldvin í grein sinni.
Carmen Jóhannsdóttir, konan sem kærði Jón Baldvin, lýsti atvikinu í viðtali við Stundina í ársbyrjun 2019. Hún sagði:
„Svo sat vinkona þeirra á milli þeirra og ég og mamma. Ég sat næst honum. Þegar ég stóð upp á einum tímapunkti og fór að skenkja í glösin, þá bara gerði kallinn sér lítið fyrir og byrjaði að strjúka á mér rassinn. Og ekkert bara rétt aðeins, heldur upp og niður strjúka á mér rassinn.“
Eins og að framan greinir harðneitar Jón Baldvin að hafa brotið gegn konunni og birtir hann yfirlýsingu frá gesti í umræddi boði, sem var í húsi Jóns Baldvins og Bryndísar Schram á Spáni, máli sínu til stuðnings. Þá birtir hann yfirlýsingu frá eiginkonu sinni, Bryndísi Schram.
„Þetta er seinasta útspilið í skipulagðri aðför að mannorði mínu og Bryndísar, sem hefur bráðum staðið yfir í tvo áratugi. Fimm sinnum hafa verið verið bornar fram kærur. Fimm sinnum hefur þeim verið vísað frá, þar sem tilefni til sakfellingar fundust ekki,“ segir Jón Baldvin meðal annars.
