Jón Atli Benediktsson, rektor Háskóla Íslands, er kominn í sóttkví ásamt tveimur öðrum starfsmönnum í aðalbyggingu skólans. Ástæðan er sú að um helgina var staðfest COVID-19-smit hjá starfsmanni í aðalbyggingunni.
Jón Atli sendi orðsendingu til nemenda og starfsfólks skólans þar sem þetta kom fram.
„Gripið hefur verið til allra nauðsynlegra ráðstafana í samstarfi við smitrakningarteymi almannavarna og sóttvarnalæknis til að hindra útbreiðslu smitsins og gæta þannig fyllsta öryggis starfsfólks og nemenda. Smitrakningarteymið hefur haft samband við alla sem þurfa að fara í sóttkví og eru það rektor og tveir aðrir starfsmenn í Aðalbyggingu. Starfsstöðvar þeirra sem eru í sóttkví hafa verið sótthreinsaðar rækilega,“ segir í orðsendingunni.
Þá segir að þetta sýni að þótt nýsmitum fari til allrar hamingju fækkandi innanlands sé faraldrinum langt í frá lokið.
„Ég vil því hvetja ykkur öll, kæra samstarfsfólk og nemendur, til að nota rafræna kosti til fundarhalda og fylgja reglum sóttvarnaryfirvalda í einu og öllu. Gætum áfram fyllsta hreinlætis og höldum að minnsta kost eins metra lágmarksbili á milli okkar. Ef við finnum fyrir minnstu einkennum eigum við í öllum tilvikum að halda okkur heima. Einnig vil ég hvetja starfsfólk til að nota fjarfundi eins og kostur er til að lágmarka smithættu,“ sagði hann meðal annars.
