Hugur breska stórleikarans John Cleese virðist nú vera hjá íslensku þjóðinni, ef marka má nýjustu færslu hans á Twitter, en hann rifjar þar upp auglýsingu sem hann gerði fyrir Kaupþing þegar bankinn breytti nafni sínu úr KB-banki áramótin 2006/2007.
„Ég hef stórlega vanmetið íbúafjölda Íslands! 300 þúsund milljónir?!“ skrifar leikarinn í færslunni og birtir með myndband úr téðri auglýsingu. Þar sést hann standandi í eldhúsi við það að hella sér upp á kaffi þegar hann spyr hversu margar milljónir búa á Íslandi.
„Þrjú hundruð þúsund,“ heyrist kallað úr mynd sem fær Cleese til að gapa og spyrja; „Þrjú hundruð þúsund milljónir?!“
Því næst spyr hann hversu mörg fyrirtæki séu á Íslandi og fær þau svör að þúsundir fyrirtækja sé að finna hér á landi. „Jahérna, kannski allir á Íslandi eigi fyrirtæki.“
„Ef íbúar Íslands eru aðeins þrjú hundruð þúsund, af hverju eruð þið þá yfirhöfuð að búa til auglýsingar? Hvers vegna hringið þið ekki bara í alla?“ segir Cleese síðan í lok auglýsingarinnar.
Ýmis vötn hafa runnið til sjávar á þeim rúmlega fjórtán árum frá því að auglýsingin var frumsýnd og vafalaust eru fleiri meðvitaðir um stöðu Íslands. Fleiri auglýsingar sem Cleese gerði með Kaupþingi má finna hér fyrir neðan.
I've greatly underestimated the population of Iceland! 300,000 Million?! pic.twitter.com/YEdI0JViJj
— John Cleese (@JohnCleese) April 10, 2021
