Jóhannes Þór Skúlason segir tíma sinn í forsætisráðuneytinu sem aðstoðarmaður Sigmundar Davíðs Gunnlaugssonar hafi verið rússibanareið en þar voru þeir frá 2013 til 2016. Þetta segir Jóhannes í nýjasta þætti Mannamáls.
Hann segir að á þeirra borði á þessum tíma hafi verið stór verkefni tengd hruninu og Alþjóðagjaldeyrissjóðnum.
„Ég fór inn í þetta með það í huga að þetta er forréttindastarf. Maður verður að muna það,“ segir hann og að í þeirri stöðu sé fólk með meiri upplýsingar, en að það gefi fólki þar samt ekki leyfi til að hugsa að það hafi réttara fyrir sér en aðrir.
„Maður verður að vera tilbúinn að hlusta á önnur sjónarmið,“ segir hann og tekur fram að hann haldi því ekki fram að honum hafi tekist þetta fullkomlega.
Þá segir hann mikilvægt í pólitík að muna það góða með því slæma og minnist orða Atla Ásmundssonar, vinar hans.
„Pólitík er daglega litlar krísur sem stundum eru truflaðar af stórum krísum,“ segir Jóhannes og að eins geti í pólitík verið klippt á þátttöku manns í henni með stuttum fyrirvara.
Spurður um það hvernig honum leið þegar Sigmundur Davíð var í eftirminnilegu viðtali hjá SVT segir Jóhannes eitt það súrrealískasta sem hann hefur lent í. Sigmundur Davíð gekk út úr viðtalinu og var sýnt frá því í Kastljósi. Hægt er að horfa á það hér.
„Þetta voru blaðamenn frá virtum miðlum sem maður átti ekki von á því að myndu ljúga að manni í tvær vikur um það hvað þeir væru að gera. Ég hef alltaf verið mjög ósáttur við það,“ segir Jóhannes og að honum hafi eftir það þótt gott að Sigmundur og eiginkona hans, Anna Sigurlaug Pálsdóttir, hafi opnað á allt sitt um leið og að hann hafi ekki upplifað að það væri verið að fela neitt fyrir honum.
„Þetta var mjög erfiður tími og flókið mál,“ segir hann og að á þeim tíma hafi þeir verið með fjölmiðla alls hins vestræna heims á herðum sér.