Jóhann Páll Jóhannsson, fyrrverandi blaðamaður og frambjóðandi Samfylkingarinnar fyrir komandi Alþingiskosningar, hristir hausinn yfir dagskrá Alþingis í dag. Þing kom saman í dag eftir vikna páskafrí og hefðu eflaust margir talið að sóttvarnarlög yrðu ofarlega á blaði eftir atburði síðustu vikna.
Jóhann Páll segir á Facebook-síðu sinni:
„Í dag kemur þing saman eftir tveggja vikna frí og fjallar t.d. um þær reglur sem gilda um ræktun og framleiðslu iðnaðarhamps, sölu á nikótínvörum, rafræn meðmæli vegna kosninga, allt mikilvæg málefni – en hvernig væri samt að byrja á því að laga sóttvarnalögin og tryggja að ráðherra hafi valdheimildir til að setja reglur í takt við ráðleggingar sóttvarnaryfirvalda – hámarka þannig líkurnar á að við getum sem flest notið sumarsins.“
Helga Vala Helgadóttir, þingkona Samfylkingarinnar, segir að ástæðan sé í raun einföld: „Sjálfstæðisflokkurinn hefur neitunarvald í ríkisstjórn og þess vegna kemur þetta frumvarp ekki fram.“
Jóhann Páll vísar svo í færslu sinni til hlutfalls þeirra sem vilja harðari sóttvarnaraðgerðir á landamærum, samkvæmt könnun Félagsvísindastofnunar Háskóla Íslands.
„Ef rýnt er betur í gögnin má sjá að hátt í helmingur vill „mun harðari aðgerðir“ á landamærum, 18 prósent vilja óbreytt ástand og innan við 3 prósent vilja tilslakanir.
97 prósent treysta sóttvarnalækni sem hefur einmitt talað fyrir hertum sóttvörnum á landamærum, og mun fleiri eru óánægðir heldur en ánægðir með áform ríkisstjórnarinnar um að taka upp litakóðunarkerfi við landamærin þann 1. maí þvert á vilja sóttvarnalæknis.“
Jóhann Páll segir að það ríki sem sagt nokkuð breið samstaða meðal landsmanna um nauðsynlegar sóttvarnarráðstafanir en alger óeining innan stjórnarliðsins.
„Ráðherrar og þingmenn hafa talað þvers og kruss og Alþingi skellti sér í páskafrí án þess að tryggja að lagagrundvöllur væri fyrir þeim aðgerðum sem taldar eru áhrifaríkastar til að verja heilsu, frelsi og efnahag innanlands.“
