Jóhann Bjarni Kolbeinsson, fréttamaður á RÚV til margra ára, greinir frá því í opinni færslu á Facebook að hann, unnusta hans og tvö börn, 9 ára og 9 mánaða, séu með COVID-19. Sýni fimm ára dóttur þeirra reyndist neikvætt.
Jóhann Bjarni segir að margir hafi sett sig í samband við fjölskylduna á undanförnum dögum og því sé best að upplýsa um stöðuna.
„Við erum öll í einangrun austur á landi, þar sem við greindumst. Við höfum það þokkalegt og erum með frekar lítil einkenni,“ segir hann. Fyrstu einkenni gerðu vart við sig hjá konunni hans, Eyrúnu, sem var veik í nokkra daga áður en hún fór í sýnatöku á Egilsstöðum og greindist með smit.
„Við hin fórum í skimun í kjölfarið. Ekkert okkar er með mikil einkenni. Við getum ekki annað en vonað að það haldist þannig,“ segir Jóhann Bjarni.
Hann segir að skiljanlega hafi frétt um að níu mánaða barn hafi greinst með veiruna vakið mikil viðbrögð. Um er að ræða dóttur þeirra og segir Jóhann Bjarni að hún sé brött og með lítil sem engin einkenni.
„Við höfum ekki hugmynd um hvar eða hvernig við smituðumst. Við höfum verið á mjög löngu ferðalagi um landið, og vorum á Norðurlandi í ca. viku nokkrum dögum áður en Eyrún fékk fyrstu einkenni. Okkur grunar að við höfum smitast þar; líklega á Akureyri, Húsavík eða Mývatni. Enginn vina okkar sem við hittum á þessum stöðum er hins vegar smitaður, að því er við best vitum. Það er því líklegast að við höfum smitast á tilviljanakenndum stað; í verslun, í sundi, á veitingastað, hóteli eða öðrum slíkum stað. Það segir sína sögu um hversu ofboðslega skæð þessi veira greinilega er,“ segir Jóhann Bjarni í færslunni.
Hann segir að 15 manns hafi verið settir í sóttkví vegna tengsla við fjölskylduna áður en smitið greindist. Þá segir hann að heilbrigðisyfirvöld hafi haldið vel utan um fjölskylduna, bæði heilbrigðisstofnunin fyrir austan, COVID-göngudeildin á Landspítalanum, Barnaspítalinn og smitrakningarteymið. „Þetta fólk á allt mikið hrós skilið.“
Í ljósi þess að fjölmargir hafa sett sig í samband við okkur Eyrúnu á undanförnum dögum, og margir eru eðlilega...
Posted by Jóhann Bjarni Kolbeinsson on Mánudagur, 17. ágúst 2020
