Forsvarsmenn Joe & the Juice eru gáttaðir á ákvörðun Isavia um að úthýsa veitingastaðnum af Keflavíkurflugvelli, að því er fram kemur í frétt á vef Fréttablaðsins.
Áður kom fram í Morgunblaðinu að veitingastaðurinn Nord, barinn Loksins og Joe & the Juice myndu brátt hverfa á braut úr flugstöðinni. Tvö veitingarými verða boðin út saman og einnig í boði að taka að sér þriðja veitingarýmið annars staðar í flugstöðinni.
„Joe & the Juice hefur um árabil verið lang vinsælasti veitingastaðurinn á vellinum. Sé horft til skoðanakannana sem ISAVIA hefur framkvæmt er ljóst að vöruframboð og þjónusta Joe & the Juice passar nær fullkomlega við óskir ferðalanga, bæði innlendra og erlendra. Ákvörðun um að sækjast eftir annarskonar veitingum kom okkur því verulega á óvart,“ segir Agla Jónsdóttir, fjármálastjóri Joe Ísland ehf.
„Félaginu þykir það einkennileg nálgun að úthýsa vöru og þjónustu með þessum hætti í stað þess að bæta frekar við öðrum valmöguleikum og auka þannig hag opinbera fyrirtækisins ISAVIA og bjóða ferðalöngum það sem þeir óska eftir,“ segir í tilkynningu frá félaginu.
„Dagurinn hefur farið í að ræða við samstarfsaðila og starfsfólk en við höfum einnig fengið fjöldann allan af skilaboðum frá viðskiptavinum sem lásu um þetta í fjölmiðlum í morgun. Joe mun starfa óbreytt fram til áramóta og bjóðum við alla velkomna til okkar. Í kjölfarið munum við skoða alla möguleika sem bjóðast á Keflavíkurvelli enda ljóst að mikil eftirspurn er eftir okkar vörum og þjónustu þar,“ segir Agla.
