Jódís Skúladóttir, þingkona Vinstri grænna, segir mikilvægt að landsmenn búi við jafnræði þegar dauðinn knýr dyra. Jódís missti dreng úr móðurkviði þann 3. júní síðastliðinn, Sigbjörn Skógar Jódísarson. Fréttablaðið ræðir við Jódísi í dag.
Jódís flutti fyrir skemmstu tillögu um að dómsmálaráðherra skipi starfshóp um umönnun og geymslu líka. Sagði hún mikilvægt að tekið yrði saman hve mörgu sé ábótavant úti á landi. Landsmenn sitji nefnilega ekki allir við sama borð þegar dauðinn knýr dyra.
Fréttablaðið sagði frá því á dögunum að dæmi væru um að lík væru flutt með flutningabíl innan um vörur svo sem kartöflupoka. Blaðið vitnaði í þingræðu Jódísar þar sem þetta kom fram. Segist Jódís hafa fengið mikil viðbrögð frá fólki en þau hafi einkum snúist um þá mismunun sem íbúar búi við eftir landsvæðum.
Í samtali við Fréttablaðið í dag segist hún hafa fengið eins góða þjónustu og hægt var að vænta í kjölfar missisins. Það vó samt þungt að hún var stödd í Reykjavík á Kvennadeild Landspítalans þegar missinn bar að.
„Ég bý á Egilsstöðum, en þegar þetta gerðist var ég í bestu aðstæðum, á höfuðborgarsvæðinu,“ segir Jódís. „Ég velti fyrir mér hvað hefði orðið ef þetta hefði gerst fyrir austan,“ bætir Jódís við í samtali við Fréttablaðið.
Nánar er fjallað um málið í Fréttablaðinu í dag og á vef Fréttablaðsins.
