Sakborningurinn sem játaði í haldi lögreglu að hafa orðið Armando Beqirai að bana í Rauðagerði í febrúar vildi ekki játa þar til lögregla sýndi honum þau sönnunargögn sem lágu fyrir í málinu.
Þetta sagði Margeir Sveinsson, yfirlögregluþjónn á blaðamannafundi lögreglunnar nú síðdegis. Þar kom fram í fyrsta skiptið að játning liggur nú fyrir í málinu. Armando var skotinn til bana fyrir utan heimili sitt aðfaranótt 14. febrúar síðastliðsins.
„Nú liggur fyrir játning í málinu sem passa við gögn og kenningar lögreglu um það hvernig atburðarásin átti sér stað. Þau sem lögreglan telur eiga hvað mesta aðild að málinu komu frá Albaníu líkt og hinn látni,“ sagði Margeir.
Fjórtán manns eru með stöðu sakbornings í málinu og segir lögregla það vekja furðu hve mörg þjóðerni eru þar á ferðinni. Þá segir Armando hafa tengst skipulagðri glæpastarfsemi.
„Hann neitaði þangað til hann var kominn upp við vegg, ef svo má segja. Þannig hefur rannsókn þessa máls verið heilt í gegn. Í upphafi vorum við með afskaplega lítið í höndunum. Og kom afskaplega lítið fram til að gera í yfirheyrslum. Þannig þetta var eiginlega bara byggt á gögunum og þeim aðferðum sem við höfum beitt.“
Margeir segir lögreglu eiga eftir 2-3 vikur af rannsókn málsins. Ljóst er að hópurinn sem myrti Armando kom ekki hingað til lands gagngert í þeim tilgangi, heldur hafa flestir verið búsettir hér um nokkurra ára skeið.
