Jakob Bjarnar Grétarsson, blaðamaður á Vísi, biðst afsökunar á því að hafa farið með rangt mál í Bítinu í morgun er hann var að tala um fræga kinnhestinn í Njálu.
„Afsökunarbeiðni. Í svefnrofunum í morgun, í hinu vikulega radíórausi í Bítinu á fimmtudagsmorgnum, tókst mér á einhvern undurfurðulegan hátt að snúa því á haus í öllu gasprinu að Hallgerður hafi löðrungað Gunnar, í einum frægasta og afdrifaríkasta löðrungi Íslandssögunnar — sem fornbókmenntirnar auðvitað eru,“ skrifar Jakob á facebook.
„Við trúum þessum sem nýju neti og getum ekki annað. En auðvitað var það Gunnar sem löðrungaði Hallgerði langbrók í votta viðurvist en ekki öfugt. Hallgerður neitaði svo Gunnari um lokk úr hári sínu þegar bogastrengur hann brast á ögurstundu. „Þá skal eg nú, muna þér kinnhestinn og hirði eg aldrei hvort þú verð þig lengur eða skemur,“ sagði Hallgerður og því fór nú sem fór. Ég vil þakka þeim sem þegar hafa bent mér á þetta mishermi og vona að þeir geti fundið það í hjarta sínu að fyrirgefa mér heimskuna,“ skrifar hann enn fremur.
