Netverjar hafa verið æfir út i tónlistarmanninn Bubba Morthens eftir að lögmaður hans Einar Þór Sverrisson og Sölvi Blöndal, framkvæmdastjóri Öldu Music, funduðu með Stefáni Eiríkssyni útvarpsstjóra og kröfðust þess að því yrði svarað hvers vegna nýlegt lag sem Bubbi gaf út með tónlistarmanninum Auði hafi varla heyrst á Rás 2.
Samkvæmt heimildum Vísis vildu Einar og Sölvi fá svör við því hvort ástæðuna fyrir þessari spilun mætti rekja Atla Más Steinarssonar dagskrárgerðarmanns á Ríkisútvarpinu en Atli hefur opinberlega gagnrýnt Bubba fyrir að vinna með Auði.
Bubbi er með sýningu í Borgarleikhúsinu þar sem fjallað er um kynferðisofbeldi sem hann lenti í. Síðan ákveður hann að gera lag með Auður. Spyr engan og tekur sér stöðu gegn þolendum. Hvað hefur hann að segja núna?
— Atli Már Steinarsson (@RexBannon) October 14, 2022
Hmm? @BubbiMorthens ?https://t.co/9j5Bk89HMc
Matthías Már Magnússon, dagskrárstjóri Rásar 2, hafnaði því þó að Atli Már bæri ábyrgð á dræmri spilun landsins á stöðinni. Þetta kemur fram á DV.is.
Jakob Bjarnar Grétarsson, fréttamaður á Vísi og sá sem skrifaði upprunalegu greinina um málið, hefur nú tjáð sig um þetta fjaðrafok sem orsakaðist vegna fréttarinnar. Í færslu sem Jakob birtir á Facebook-síðu sinni í dag gagnrýnir hann þau sem hjóluðu í Bubba í gær.
„Bubbi Morthens og Auður gera lag saman. Lagið nýtur gríðarlegra mælanlegra vinsælda nema það heyrist vart á ríkisrekinni útvarpsrás sem gefur sig meðal annars út fyrir að segja landsmönnum af því hvað klukkan slær í nýgildri tónlist. Og á þeirri stöð starfar maður sem sakar Bubba um gerendameðvirkni af mikilli hörku opinberlega vegna útgáfunnar. Bubbi spyr hvað sé í gangi, hvort verið geti að þetta tvennt tengist, og telur sig hafa góðar og gildar ástæður fyrir því. Og það eina sem menn vilja taka út úr þessu er að Bubbi Morthens (sjálfur) sé að væla vegna þess að hann fái ekki spilun?! Afsakið en vá hvað þetta er eitthvað níðangurslegt og/eða lélegt,“ skrifar Jakob.
