Írskur fjölmiðill greinir frá því í dag að Jón Þröstur Jónsson hafi verið myrtur af öðrum Íslendingi í Dublin í fyrra. Maðurinn er sagður hafa lánað Jóni pening sem hann svo tapaði á pókermóti. Í kjölfarið hafi maðurinn myrt Jón fyrir slysni. Vísir greindi fyrst frá þessu.
Jón hvarf þann 9. febrúar í fyrra í Dublin. Hann var þar ásamt kærustu sinni til að taka þátt á pókermóti. Síðast sást til hans á gangi um hverfi í norðurhluta Dublin.
Leit að Jóni hafði gengið illa og lítið af vísbendingum komið fram síðustu mánuði þar til íslenskur fangi, sem situr inni fyrir stuld, setti sig í samband við fjölskyldu Jóns til að greina henni frá því að samfangi hans hefði myrt Jón. Írski fjölmiðillinn segir morðingjann þannig vera mann sem nú situr inni á Íslandi.
Jón á að hafa tapað rúmlega fjögur þúsund evrum í ólöglegum póker þetta kvöld og voru evrurnar í eigu íslenska glæpamannsins.
Í samtali við Fréttablaðið vildi Karl Steinar Valsson, yfirlögregluþjónn hjá miðlægri rannsóknardeild Lögreglunnar á höfuðborgarsvæðinu, ekki staðfesta þetta. Hann sagðist þó geta staðfest að lögreglu hefðu borist ýmsar ábendingar sem hún hefði verið að skoða og viðrað við írsk yfirvöld sem stýra rannsókninni.
