Íslensk kona sem lýst var eftir í dönskum fjölmiðlum í gær fannst látin í morgun, að því er segir í tilkynningu frá dönsku lögreglunni.
Konan var 43 ára og hefur fyrrverandi sambýlismaður hennar, 51 árs gamall, verið handtekinn vegna gruns um að hafa orðið henni að bana. Ekkert hafði spurst til konunnar síðan á fimmtudag í síðustu viku.
Í tilkynningu sem lögreglan birti á heimasíðu sinni segir að konan hafi fundist látin á heimili sínu í Veilgårdsparken í Malling. Réttarrannsókn fer fram sem mun skera úr um hvort líkið sé af henni, en að sögn Michael Kjeldgaard, yfirmanns lögreglunnar, eru yfirgnæfandi líkur á að líkið sé af konunni sem lýst var eftir.
Í tilkynningu lögreglu segir enn fremur að fyrrverandi sambýlismaður hennar, sá hinn sami og tilkynnti um hvarf hennar, hafi verið handtekinn vegna málsins. Telur lögregla að hann hafi verið viðriðinn andlát hennar og verður farið fram á gæsluvarðhald yfir honum í dag.
