Íslendingar sem búsettir eru hér á landi vita sem er að það fylgja því margir kostir að búa í friðsælu, litlu og fallegu landi. Þó Ísland hafi sína kosti hefur það einnig sína galla. Á Reddit fara nú fram fjörugar umræður um helstu ókosti þess að búa á Íslandi.
Umræðan fer fram á sérstökum þræði um Ísland á Reddit en 45 þúsund notendur fylgja umræddum þræði. Ætla má að í þeim hópi séu margir útlendingar enda fara allar umræður fram á ensku.
Sá sem hóf umræðuna bað Íslendinga um að nefna það sem mætti betur fara hér á landi.
Það kemur kannski ekki á óvart að meðal þess sem notendur nefna er verðtryggingin og hátt verðlag á íbúðarhúsnæði. Bent er á að Ísland sé eina landið í heiminum þar sem verðtryggingin fyrirfinnst.
Einn segir allt að því vonlaust fyrir ungt fólk að kaupa sér sína fyrstu fasteign. „Fasteignaverð er allt of hátt. Ég er feginn að hafa keypt fyrir nokkrum árum. Það er brjálæði hvað ungt fólk þarf að borga til að komast inn á markaðinn,“ segir einn.
Sá hinn sami nefnir einnig veðrið. „Veðrið er eiginlega alltaf ömurlegt. Ísland væri líklega besti staður í heimi til að búa á ef veðrið væri ekki alltaf svona leiðinlegt. Vindurinn fer sérstaklega í taugarnar á mér. Mér er sama um rigninguna eða kuldann en ég þoli ekki rokið.“
Þá nefnir einn aðgengi að geðheilbrigðisþjónustu sem mætti vera betri. Þannig mætti ríkið taka meiri þátt í niðurgreiðslu þegar kemur að geðheilbrigðisþjónustu. „Biðlisti eftir ADHD-greiningu tekur til dæmis 12 mánuði fyrir börn og allt að þrjú ár fyrir fullorðna.“
Þá nefnir einn að almenningssamgöngur gætu verið betri. Einn, sem kveðst vera Bandaríkjamaður, segist einu sinni hafa notað Strætó og það ætli hann ekki að gera aftur.
Þá nefnir einn Íslendingur, sem kveðst vera búsettur í Ástralíu, nokkur atriði sem hann saknar ekki frá Íslandi. Viðkomandi nefnir til dæmis að hér á landi telst það dyggð að vinna mjög mikið. „Að vinna í 50 til 60 tíma á viku var bara normið í sjö ár. Jú, launin voru ágæt en ekki þess virði. Ég hef ekki unnið einn yfirvinnutíma síðustu tvö ár og ég er alveg jafn vel staddur fjárhagslega,“ segir Íslendingurinn sem vinnur í heilbrigðisgeiranum.
Hann nefnir einnig leigumarkaðinn og bendir á að árunum 2014-2016 hafi fólk bókstaflega þurft að slást um lausar eignir.
Þá kemur það eflaust ekki mörgum á óvart að gjaldmiðillinn okkar er nefndur til sögunnar. Krónan sé of óstöðug og það sé óþægilegt að hafa gjaldmiðil sem getur sveiflast eins og lauf í vindi gagnvart öðrum gjaldmiðlum á stuttum tíma.
Hér má kynna sér umræðuna betur.
