Ingu líst ekkert á blikuna: „Viljum við þurfa að taka slíkar á­kvarðanir?“ – Vill grípa strax í taumana

Inga Sæ­land, for­maður Flokks fólksins, spyr hvort ekki sé réttast að grípa í taumana með af­gerandi hætti og setja nú þegar á sam­komu­bönn og tak­markanir eins og gert var í mars og apríl. Inga skrifar um CO­VID-19 í Morgun­blaðið í dag en hún hefur á­hyggjur af vaxandi tíðni smita hér á landi.

„Þegar þetta er ritað eru 80 manns í ein­angrun og 670 í sótt­kví hér á landi af völdum Co­vid-19. Allt bendir til að við stöndum nú frammi fyrir nýrri smit­bylgju þessa sjúk­dóms,“ segir Inga sem veltir fyrir sér hvort ekki hafi verið mis­tök að af­létta hömlum þann 15. júní síðast­liðinn. Segir hún að stjórn­völd hafi þá tekið þá á­kvörðun að flytja veiruna inn á ný.

„Það er aug­ljóst að nýr Co­vid-19-far­aldur mun reynast sam­fé­lagi okkar miklu dýr­keyptari heldur en ef við hefðum haldið fast í hömlurnar. Til hvers var verið að opna fyrir komu fólks er­lendis frá? Af hverju voru varnirnar ekki betri en raun bar vitni? Hverjum átti að reyna að bjarga? Flest ferða­þjónustu­fyrir­tæki hér á landi voru tækni­lega gjald­þrota þegar um síðustu ára­mót, áður en Co­vid-far­aldurinn hófst. Það tjáði einn helsti tals­maður ferða­þjónustunnar í mín eyru í mars,“ segir hún.

Inga segir að ríkis­stjórnin og þing­flokkar hennar hafi vitað þetta mæta­vel og raunar vitað allan tímann. Spyr hún hvort peningum hafi verið mokað í fyrir­tæki sem hvort eð er voru komin á vonar­völ.

„Höfum við hætt öllu, með því að létta á hömlum vegna Co­vid til að „bjarga“ rekstri sem hvort eð er var á vonar­völ fyrir löngu? Hvernig ætlum við nú að bregaðst við nýjustu aukningu í smitum? Er ekki réttast að grípa á­kveðið í taumana og setja nú þegar á sam­komu­bönn og tak­markanir eins og við gerðum í mars og apríl? Það er greini­lega það eina sem dugar til að vinna bug á smiti. Reynslan í vor kenndi okkur það með af­gerandi hætti.“

Inga segir að við getum ekki leyft okkur að fara inn í haustið með vaxandi og jafn­vel háa smit­tíðni í sam­fé­laginu. Af­leiðingarnar gætu verið þær að ekki verði hægt að opna fram­halds- og há­skóla og jafn­vel ekki heldur grunn­skólana.

„Viljum við þurfa að taka slíkar á­kvarðanir? Það blasir við að kórónu­veirufar­aldrinum er hvergi lokið. Á­hættan sem verið er að taka með því að hafa of rúm sam­göngu­skil­yrði er gífur­leg. Ekkert má út af bera til að ekki komi upp til­felli sem geta reynst afar dýr. Dæmið um far­þega­skipið Roald A­mund­sen í Noregi ætti að segja okkur allt um það. Pestin er að gjósa upp á ný í Fær­eyjum þar sem menn töldu sig hafa út­rýmt henni með því að loka landinu og hefja um­fangs­mikla sýna­töku og smitrakningu. Sagt er að við eigum að læra að lifa með Co­vid. Ég vil geta lifað án Co­vid ef þess er nokkur kostur og Ís­land var jú orðið Co­vid-frítt.“

Inga segir að ef það kostar að við verðum að setja á mjög strangar tak­markanir á ferðir fólks til og frá landinu þar til tekst að þróa bólu­efni þá verði svo að vera. „Að ætla okkur að læra að lifa með þessari pest kostar ein­fald­lega of mikið. Fórnar­kostnaðurinn er ó­rétt­lætan­legur með öllu.“