Uppselt er á alla ferna tónleikana sem Ingólfur Þórarinsson, betur þekktur sem Ingó veðurguð, ætlar að halda um næstu helgi. Ingólfur tilkynnti þetta á Facebook-síðu sinni í gær og er þakklátur fyrir áhugann sem fólk hefur sýnt tónleikunum.
Tvennir tónleikar verða haldnir á föstudagskvöld, klukkan 19:30 og 22:00, og svo tvennir á laugardagskvöld á sama tíma.
„Til að bregðast við fjölda fyrirspurna verður tónleikunum á laugardagskvöldið kl 19.30 streymt í beinni útsendingu gegnum sjónvarp Símans og Livey Events,“ segir Ingó í færslu sinni og bætir við:
„Ég þakka öllum innilega fyrir og get ekki beðið eftir þessari helgi […] Takk Fyrir mig.“
Ingólfur hefur ekki komið fram opinberlega hér á landi í um tvö ár eftir að ásakanir um kynferðisofbeldi og áreitni komu fram á hendur honum. Hann hefur sjálfur vísað þessum ásökunum á bug.
Í samtali við Vísi í síðustu viku, þar sem greint var frá því að miðasala á tónleikana hefði gengið vonum framar, sagðist Ingó fullur tilhlökkunar og hafa góða tilfinningu fyrir tónleikunum.
„Fernir tónleikar, flott hljómsveit, flottur salur. Þetta verður gleði og skemmtun og allur fókus á það og ekkert annað,“ sagði hann.
